ԵՐԵՎԱՆ, 6 հուլիսի — Sputnik. «Ժողովուրդ» թերթը գրում է․ «Ինչպես հայտնի է` երեկ ԵԿՄ-ում տեղի է ունեցել նիստ՝ վարչության փոխնախագահների, Երևանի ու մարզերի տարածքային բաժանմունքների նախագահների, վարչության անդամների մասնակցությամբ, և որոշում է կայացվել կառույցի ղեկավարի պաշտոնում առաջադրել Սպարապետ Վազգեն Սարգսյանի եղբոր՝ «Հանրապետություն» կուսակցության նախագահ Արամ Սարգսյանի թեկնածությունը:
Այս հանգամանքը, սակայն, չեն ընդունել ազատամարտիկները, որոնք ժամանակին հեռացել էին ԵԿՄ-ից, բայց ԵԿՄ նախկին նախագահ Մանվել Գրիգորյանի ձերբակալությունից հետո վերադարձել են:
Խոսքն առաջին հերթին «Ազատամարտիկների դաշինքի» ներկայացուցիչների մասին է, որոնք պնդում են, թե ճիշտ է այս պահին ԵԿՄ նախագահ չունենալը, և որ կառույցը պետք է ղեկավարվի կոլեգիալ սկզբունքով:
«Ազատամարտիկների դաշինքի» անդամ Ռազմիկ Պետրոսյանը «Ժողովուրդ» օրաթերթի հետ զրույցում ընդգծեց. «Առաջիկայում կորոշենք՝ համագործակցե՞նք, թե՞ ոչ։ Իսկ Արամ Սարգսյանի հետ կապված ասեմ, որ մենք դեմ չենք, նա այն մարդն է, որի շուրջ Երկրապահը կարող է համախմբվել»:
