ԵՐԵՎԱՆ, 6 հուլիսի — Sputnik. Ստուգումներն Ամուլսարի հանքավայրում շարունակվում են։ Այսօր Ջերմուկում «Լիդիան Արմենիայի» ու բնապահպանների հետ համատեղ քննարկմանը հայտարարեց վարչապետ Նիկոլ Փաշինյանը։
Նրա խոսքով` դրանց նպատակն է պարզել հանքի հնարավոր ազդեցությունը ջրային ռեսուրսների ու Ջերմուկ առողջարանային կենտրոնի վրա։ Այս երկու հարցերն ամենակարևորն են, որոնց պատասխանը պիտի տա ուսումնասիրությունը, և դրանցից է կախված նաև հանքի հետագա ճակատագիրը։
«Հանքի հետ կապված որոշումները պետք է հիմնված լինեն փաստերի, բայց ոչ էմոցիաների վրա։ Այս հարցերի պատասխանները պետք է հիմնավորվեն ոչ թե կարծիքներով, այլ փաստերով»,– ասաց վարչապետը։
Փաշինյանը հիշեցրեց, որ հանքի շահագործման նախապատրաստական աշխատանքների 80% արդեն արված է։
«Կարող է լինել նաև այնպիսի վարկած, որ այս ամբողջ պատմության իմաստն այն է, որ որոշ մարդիկ ուզում են իրավիճակ ստեղծել, որ Հայաստանին մեծ դատական գործընթացների մեջ ներքաշեն»,– ասաց Փաշինյանը։ Վարչապետը նշեց, որ սա իրեն հայտնել են զուտ որպես հնարավոր վարկած, և ինքը տեղյակ չէ, թե ովքեր են այդ հնարավոր մարդիկ։
Անդրադառնալով հնչող տեսակետներին, թե հանքշահագործման թույլտվությունը նախկին իշխանությունների օրոք տրվել է` իրավախախտումների արդյունքում` Նիկոլ Փաշինյանը հայտարարեց, որ եթե ապացուցվի, մեղավորներն, անպայման, պատասխանատվության կենթարկվեն։ Բայց դա չի կարող լինել հայտարարությունների մակարդակով, անհրաժեշտ են փաստեր։
Վարչապետի մամուլի խոսնակ Արման Եղոյանն էլ ֆեյսբուքյան իր էջում նկար է հրապարակել, որտեղ` ուղղաթիռի մեջ Հայկական բնապահպանական ճակատի ներկայացուցիչ Լևոն Գալստյանը և Լիդիան Արմենիա ընկերության գործադիր տնօրեն Հայկ Ալոյանը վարչապետին են ներկայացնում Ամուլսարի հանքավայրի վերաբերյալ իրենց դիրքորոշումները։
«Ապա վարչապետն ուղղաթիռից դիտարկեց Ամուլսարն ու շրջակա միջավայրը՝ կրկին համադրելով կողմերի ներկայացրած փաստարկներն ու մտահոգությունները»,–գրել է Եղոյանը։
