ԵՐԵՎԱՆ, 5 հուլիսի — Sputnik. Երևանի Մաշտոցի պուրակում այսօր հեղափոխական տրամադրություն էր։ «Հոդված 3» ակումբի կազմակերպած «Հեղափոխության դեմքերն ու դեպքերը» խորագրով ցուցահանդեսի այցելուները ոչ միայն փորձում էին ծանոթ դրվագներ գտնել թավշյա հեղափոխության օրերին արված լուսանկարներում, այլև վերհիշել այդ օրերի կարգախոսները, հեղափոխական անցուդարձի անբաժան մասը կազմող իրերը։
Ցուցահանդեսի կազմակերպիչ Գայանե Աբրահամյանը հայտնեց, որ ներկայացված լուսանկարների հեղինակները ոչ միայն պրոֆեսիոնալ լուսանկարիչներ են, այլև հեղափոխության մասնակից քաղաքացիներ։
Ցուցանմուշների շարքում են նաև Բաղրամյան պողոտայում պայթյունից պատառոտված բաճկոնը, բարձրախոսները, որոնցից այսօր միայն երկուսն են աշխատում։
Գայանե Աբրահամյանը հայտնեց, որ ցուցահանդեսը հետագայում հեղափոխության թանգարանի վերածելու մտադրություն ունեն։ Դրա համար սպասում են արդեն հեղափոխության գլխավոր գործող անձանց նվիրատվություններին։
«Արայիկ Հարությունյանի փայտը, Նիկոլ Փաշինյանի ուսապարկը, թերևս, ամենակարևոր ցուցանմուշները կլինեն»,– ասաց նա` հավելելով, որ առաջիկայում պատրաստվում են դիմել վարչապետին` իր ուսապարկը թանգարանին նվիրելու առաջարկով։
Մինչ այդ ցուցահանդեսի բացմանը ներկա առաջին փոխվարչապետ Արարատ Միրզոյանն արդեն իսկ խոստացավ նվիրել իր ուսապարկն ու այդ օրերին իր համար կարևոր նշանակություն ունեցած մի քանի այլ իրեր։
«Գուցե ուսապարկս նվիրեմ։ Մտածում եմ նվիրել իմ մեքենան, որը ոստիկանները ջարդել են, մտածում եմ գնային առումով դա կարող է շատ թանկ նվեր լինել։ Եվ երրորդը` ինձ մի իր են նվիրել, որը գումարային արժեք չունի, գուցե մի երկու տարի հետո կնվիրեմ»,– Sputnik Արմենիայի հարցին ի պատասխան ասաց Միրզոյանը։
Թավշյա հեղափոխության ամենավառ պատկերները, որ տպվել են Արարատ Միրզոյանի այդ օրերի հիշողություններում, աթոռներին նստած փոքրիկներն են, ովքեր իրենց խաղալիք ավտոմեքենաներով փակել էին փողոցը, հեղափոխության խորհրդանիշ դարձած Լեյլա տատիկն ու մանկասայլակներով մայրերը։ Հեղափոխության ամենահուզիչ պահը Արարատ Միրզոյանի համար, այն պահն էր, երբ քայլարշավի ավարտին Երևան հասնելով, տեղեկացավ, որ Երևանի Ազատության հրապարակում իրենց ակնկալած թվից շատ ավելի մարդ է հավաքվել։
