ԵՐԵՎԱՆ, 4 հուլիսի — Sputnik. ՀՀ ազգային ժողովի «Հանրապետական» խմբակցության պատգամավոր, ՀՀ նախկին ոստիկանապետ Ալիկ Սարգսյանը հանցագործության մասին հաղորդում է ներկայացրել ՀՀ հատուկ քննչական ծառայություն:
ՀՔԾ մամուլի խոսնակ Մարինա Օհանջանյանը Sputnik Արմենիայի հետ զրույցում հաստատեց, որ պատգամավորից ստացել են հանցագործության մասին հաղորդում։
«Այս պահին, սակայն, մանրամասներ չեմ կարող ներկայացնել, առաջիկայում եթե հրապարակման ենթակա տեղեկություն լինի, կտեղեկացնենք», — ասաց Օհանջանյանը։
Նշենք, որ ոստիկանությունն օրեր առաջ հայտարարություն էր տարածել` նշելով, որ եթե մարդիկ նախկինում ականատես են եղել հանցագործության կամ տուժել են հանցագործությունից և ինչ-ինչ պատճառներով չեն դիմել ոստիկանություն, հիմա դիմեն։
Ոստիկանությունը նշել էր նաև, որ երաշխավորում է բոլոր դիմումների անաչառ քննությունը։
