Հայաստանում գրանցված վերջին հրդեհների 2/3-ը տեղի են ունեցել խոտածածկ տարածքներում։ Sputnik Արմենիայի հետ զրույցում այս մասին ասաց ՀՀ ԱԻՆ փրկարար ծառայության տնօրենի տեղակալ Վրեժ Գաբրիելյանը։
«Հրդեհները հատկապես ակտիվանում են հովտային հատվածներում, որտեղ ջերմաստիճանն ավելի բարձր է, և խոտածածկն արագ չորանում է»,- ասաց նա։
Ամռան ընթացքում հրդեհների առաջացման հաջորդ հիմնական պատճառը քաղաքացիներն են, որոնք անտառամերձ հատվածներում իրենց հանգստի ընթացքում չեն պահպանում հրդեհային անվտանգության կանոնները։
«Պետք է խուսափել բաց կրակ օգտագործելուց, որտեղ չորացած խոտ կա, այնտեղ չհանգած ծխախոտ չգցել, ուշադիր լինել, որ այն չբռնկվի։ Իսկ եթե նկատել են, որ կրակ է բռնկվում, մոտակա ջրատար տարածքից 1-2 դույլ ջուր լցնել, հանգցնել, ոչ թե նայել, թե ինչպես է հրդեհն այրվում»,- հայաստանցիներին հրդեհներից խուսափելու ուղին է մատնանշում մեր զրուցակիցը։
ՀՀ ԱԻՆ պաշտոնական վիճակագրության համաձայն` անցած մեկ շաբաթվա ընթացքում Հայաստանում շուրջ 267 հրդեհ է գրանցվել, որի 2/3-ը` խոտածածկ տարածքներում։
Այս վիճակագրությունը, Վրեժ Գաբրիելյանի խոսքով, ավելացել է` պայմանավորված չորային, շոգ եղանակով։
Եթե անցած ամիս Հայաստանի ամբողջ տարածքը գերխոնավացած էր առատ անձրևների շնորհիվ, ապա այսօր արդեն չոր եղանակի կանխատեսման պայմաններում ԱԻՆ-ում հրդեհների աճ են կանխատեսում։
Նշենք, որ Հիդրոմետ ծառայության տվյալներով` տաք օդային հոսանքների ներթափանցմամբ պայմանավորված՝ մինչ հուլիս 5-ը հանրապետության տարածքում սպասվում է 42 աստիճան տաքություն, հուլիսի 6-ից ջերմաստիճանը կնվազի 1-2 աստիճանով: Բայց հրդեհավտանգ իրավիճակը կպահպանվի նաև դրանից հետո։
