ԵՐԵՎԱՆ, 29 հունիսի — Sputnik. ՌԴ նախագահ Վլադիմիր Պուտինն այսօր VII հայ-ռուսական ֆորումի մասնակիցներին ողջունելիս կարևորել է միջտարածաշրջանային համագործակցության դերը Ռուսաստանի ու Հայաստանի հարաբերությունների ամրապնդման հարցում։ Ուղերձի տեքստը հրապարակվել է Կրեմլի կայքում։
«Ձեր ամենամյա հանդիպումներն արդեն բարի ավանդույթ են դարձել։ Կենտրոնական ու տեղական իշխանության ներկայացուցիչները, քաղաքական ու հասարակական գործիչները, գործարարները, գիտնականներն ու փորձագետներն իրենց փորձն են փոխանակում, համագործակցության հարցերի շուրջ կառուցողական քննարկումներ են անցկացնում», —նշվում է ուղերձում։
Նշվում է նաև, որ Ռուսաստանին ու Հայաստանին կապում են բարեկամության ու ռազմավարական գործընկերության ամուր կապերը։
«Մեր պետությունների միջև տարբեր մակարդակներով բովանդակալից երկխոսություն է հաստատվել, զարգանում է առևտրատնտեսական, գիտատեխնիկական, հումանիտար ակտիվ գործակցությունը», — Կրեմլի մամուլի ծառայությունը մեջբերում է Պուտինի խոսքերը։
Հայ-ռուսական հարաբերությունների ամրապնդման գործում կարևոր դերակատարություն ունի միջտարածաշրջանային համագործակցությունը, որի շրջանակում բազմաթիվ նախագծեր են իրականացվում ենթակառուցվածքային, հասարակական, մշակութային, սպորտային և այլ ոլորտներում։
Ռուսաստանի նախագահը համոզված է, որ համաժողովի ընթացքում մասնակիցներին կհաջողվի նոր հետաքրքիր գաղափարներ ու առաջարկություններ մշակել, որոնք կնպաստեն Ռուսաստանի ու Հայաստանի գործընկերային կապերի ընդլայնմանը, նաև եվրասիական տարածքում փոխշահավետ ինտեգրացիոն գործընթացների առաջխաղացմանը։
