ԵՐԵՎԱՆ, 29 հունիսի — Sputnik. Ադրբեջանի պատվիրակները Հայաստանի նոր իշխանություններին կոչ են արել չկրկնել նախկինների «սխալները» և «չոչնչացնել» մշակութային ժառանգությունը այսպես ասած` «գրավյալ» տարածքներում։
Այս մասին տեղեկացնում է ԵԽԽՎ հայկական պատվիրակության ղեկավարը։
Արփինե Հովհաննիսյանը ֆեյսբուքյան իր էջում գրել է.
«ԵԽԽՎ ամառային նստաշրջանի վերջին օրը քննարկվեց «Մշակութային ժառանգության դիտավորյալ ոչնչացումը և ապօրինի թրաֆիքինգ» թեմայով զեկույցը։ Որքան էլ զավեշտալի հնչի ադրբեջանցի գործընկերները Հայաստանի նոր իշխանություններին կոչ էին անում չկրկնել նախկին իշխանության «սխալները» և «չոչնչացնել» մշակութային ժառանգությունը «գրավյալ» տարածքներում»։
Արփինե Հովհաննիսյանն ու հայկական պատվիրակության մյուս ներկայացուցիչ Նաիրա Զոհրաբյանը ելույթներ են ունեցել եւ վեհաժողովին ներկայացրել հայկական մշակութային ժառանգության ոչնչացմանն ուղղված` Թուրքիայի և Ադրբեջանի իրականացրած գործողությունները։
