ԵՐԵՎԱՆ, 28 հունիսի — Sputnik. Պետերբուրգցիները պատրաստվում են մեծ իրադարձությանը` «Երևան» առևտրի տան բացմանը։ Այդ նախագիծը քաղաքի համար ռազմավարական նշանակություն ունի։ Այս մասին Sputnik Արմենիայի թղթակցի հետ զրույցում ասաց Սանկտ Պետերբուրգի փոխքաղաքապետ Աննա Միտյանինան։
Սանկտ Պետերբուրգում «Երևան» առևտրի կենտրոնի կառուցման մեկնարկի հարցը 2017 թվականի մայիսին քննարկել էին Երևանի քաղաքապետ Տարոն Մարգարյանն ու Սանկտ Պետերբուրգի նահանգապետ Գեորգի Պոլտավչենկոն։
«Սանկտ Պետերբուրգում նախատեսվում է «Երևան» առևտրի տուն բացել։ Հիմա քննարկվում է դա որպես ռազմավարական կարևորություն ունեցող նախագիծ սահմանելու հնարավորությունը։ Մենք լիովին հետևում ենք շինարարության գործընթացին, ոչ մի խնդիր չի առաջանա», — ասաց Միտյանինան։
Նրա խոսքով` քույր քաղաքների` Երևանի ու Սանկտ Պետերբուրգի համագործակցությունը վերջին տարիների ընթացքում միայն խորացել է. նույնիսկ ապրանքաշրջանառությունն է ավելացել։ Նա օրինակ էլ բերեց` բիզնես հասարակությունն ակտիվորեն մասնակցել է Երևանում Սանկտ Պետերբուրգի օրերին։
«Պետերբուրգից առևտրի, շինարարության ոլորտի գործարարներ էին եկել։ Քննարկվել է հասարակական ենթակառուցվածքներում ներդրում անելու հարցը։ Հայաստանը դրա կարիքն ունի, իսկ ռուս գործարարները շահագրգռված են եկամտի լրացուցիչ աղբյուր փնտրելու հարցում», — ասաց Միտյանինան։
Հիշեցնենք` Միտյանինան Հայաստան էր եկել Երևանում Սանկտ Պետերբուրգի մշակույթի օրերի շրջանակում։
