ԵՐԵՎԱՆ, 28 հունիսի — Sputnik. Լուրն այն մասին, թե ՀՀ նախագահ Արմեն Սարգսյանը հրաժարվել է սեղմել ԱՄՆ-ում Իսպանիայի դեսպան Պեդրո Մորենեսի ձեռքը, իրականությանը չի համապատասխանում։ ՀՀ նախագահի աշխատակազմի հասարակայնության հետ կապերի վարչությունն այս մասին կարճ հաղորդագրություն և լուսանկարներ է տրամադրել Sputnik Արմենիային։
«Հայաստանի Հանրապետության նախագահ Արմեն Սարգսյանը ոչ միայն ձեռքսեղմում, այլև ջերմ զրույց է ունեցել ԱՄՆ-ում Իսպանիայի դեսպան պարոն Պեդրո Մորենեսի հետ»,- նշված է հաղորդագրության մեջ:
Հիշեցնենք, որ այսօր` հունիսի 28-ին, նկարիչ, գրաֆիկ և դիզայներ Ռուբեն Մալայանը ֆեյսբուքյան իր էջում գրել էր, թե Հայաստանի նախագահ Արմեն Սարգսյանը հրաժարվել է սեղմել Իսպանիայի դեսպանի ձեռքը Վաշինգտոնում Սմիթսոնյան «Ֆոլքլայֆ» փառատոնի (Smithsonian Folklife Festival) բացման արարողության ժամանակ։
Ըստ Մալայանի` Իսպանիայի դեսպանն արարողության ընթացքում հայտարարել էր, որ իր երկրում չկան քաղբանտարկյալներ, ինչից դժգոհել էր Կատալոնիայի պատվիրակությունը և, ի նշան բողոքի, լքել դահլիճը։ Կատալոնացիները դուրս էին եկել փողոց և սկսել էին պարել։
![Президент Армении Армен Саркисян и посол Испании в США Педро Моренес Президент Армении Армен Саркисян и посол Испании в США Педро Моренес - Sputnik Արմենիա](https://cdn.am.sputniknews.ru/img/1293/80/12938065_0:0:1000:1333_600x0_80_0_0_1fbb732bad5ae997e2910584fd835773.jpg)