ԵՐԵՎԱՆ, 27 հունիսի — Sputnik. Տուբերկուլոզի դեմ պայքարի ազգային կենտրոնում բժիշկների աշխատավարձը հուլիսի 1-ից կբարձրանա։
Այս մասին տեղեկացնում է առողջապահության նախարարը` իր ֆեյսբուքի էջի միջոցով։ Ըստ Արսեն Թորոսյանի աշխատավարձի 25-30%-ով նախատեսվող բարձրացմանը հնարավոր է եղել հասնել ընդամենը մեկ ամսվա բարեխիղճ կառավարման, ռեսուրսների օպտիմալացման և վատնումների բացառման արդյունքում։
Հիշեցնենք, որ տուբերկուլոզի շուրջ թեմաները սկսեցին ակտիվ քննարկվել, երբ մի քանի շաբաթ առաջ մամուլում հրապարակումներ հայտնվեցին Երևանի կենդանաբանական այգում` իբրև թե բռնկված համաճարակի մասին։ Համաճարակի մասին լուրը հերքվեց։
Առողջապահության նախարարությունը տեղեկացրեց, որ անհանգստության առիթ չկա, բայց կանցկացվեն կրկնակի ստուգումներ։
Ստուգումից հետո գերատեսչությունը կրկին հավաստիացրեց, որ անհանգստանալու կարիք չկա` Երևանի կենդանաբանական այգին, գոնե տուբերկուլոզի առումով, անվտանգ է։
