ԵՐԵՎԱՆ, 24 հունիսի — Sputnik, Աշոտ Սաֆարյան. Հայաստանում կոռուպցիոներների որսը սրընթաց տեմպերով է ընթանում։ Ամեն օր նորանոր հաղորդագրություններ են հրապարակվում պետական միջոցները հափշտակելու, այս կամ այն բարձրաստիճան և ոչ այնքան բարձրաստիճան պաշտոնյային ձերբակալելու մասին։ Հակակոռուպցիոն արշավի գագաթնակետը ԱԺ պատգամավոր, գեներալ-լեյտենանտ Մանվել Գրիգորյանի ձերբակալությունն էր։ Սակայն չի բացառվում, որ մոտ ապագայում նախկին իշխանություններից որևէ մեկն իր «արժանիքներով» մթագնի գեներալին։
Միաժամանակ, փորձագետները նշում են, որ այս ամբողջ պատմությունը կարող է վերածվել հերթական «կամպանեյշինայի»՝ առանց շարքային քաղաքացիների համար կոնկրետ արդյունքների։ Նման հավանականությունը չի բացառում նաև քաղտեխնոլոգ Արմեն Բադալյանը։
«Ես, իհարկե, չեմ բացառում կոռուպցիայի դեմ պայքարի, մարդկանց պատասխանատվության ենթարկելու անհրաժեշտությունը, որոնք երկար տարիներ անձեռնմխելի են եղել։ Բայց տպավորություն է ստեղծվում, որ կառավարությունն անտեսում է մյուս խնդիրները՝ սոցիալ-տնտեսական, ֆինանսական, միգրացիոն և այլն։ Ինչպես հայտնի է, ժողովուրդը պահանջում է հաց և տեսարան։ Առայժմ հացի հետ խնդիրներ կան», — Sputnik Արմենիայի հետ զրույցում ասաց փորձագետը։
Նրա խոսքով՝ մինչև հիմա անհասկանալի է, թե զարգացման ինչպիսի վեկտոր է ընտրել կառավարությունը, տնտեսական ինչպիսի քաղաքականություն է մշակում, ինչպիսի բարեփոխումներ է ծրագրում կրթության կամ դատական համակարգի ոլորտում։
«Այդ հարցերի շուրջ քննարկումներ չկան։ Դրա փոխարեն մարդկանց ուշադրությունն ամբողջությամբ սևեռված է ձերբակալությունների ու աղմկահարույց քրեական գործերի վրա։ Այս ամբողջ իրավիճակը վերածվում է «կամպանեյշինայի»», — ասաց քաղաքական տեխնոլոգը։
Փորձագետը նշեց, որ կոռուպցիայի դեմ պայքարը պետք է ոչ թե որպես նպատակ ծառայի, այլ գործիք՝ այդ նպատակին հասնելու համար։ Բադալյանն առայժմ չի տեսնում նոր կառավարության մոտ երկարաժամկետ խնդիրներ դնելու և դրանք լուծելու ձգտում։
«Մի քանի ցուցադրական կալանքներով հեռու չես գնա, առավել ևս, որ կոռուպցիոներների գողացած ոչ բոլոր գումարներն է հնարավոր վերականգնել։ Մարդիկ պետք է իրենց վրա զգան կառավարության քայլերի արդյունքները։ Մինչև մարդկանց աշխատավարձերը և կենսաթոշակները չբարձրանան, դժվար է դատել նոր կառավարության արդյունավետության մասին», — ասաց Բադալյանը։
Ուժային մարմինների այսօրվա գործողությունները կարճաժամկետ ազդեցություն կունենան։ Պատկերավոր ասած, եթե Մանվել Գրիգորյանին կալանավորելու օրը տեղի ունենային արտահերթ ընտրություններ, ապա Նիկոլ Փաշինյանի գլխավորած քաղաքական ուժը բացարձակ մեծամասնություն կստանար խորհրդարանում։ Բայց շուտով քաղաքական ազդեցությունը կվերանա, և այս կամ այն պաշտոնյանին ձերբակալելու մասին լուրերը հերթական վերնագիրը կդառնան թերթերի էջերին։
Միևնույն ժամանակ, կոռուպցիոն աղմկահարույց պատմություններն արտահերթ խորհրդարանական ընտրությունների նախաշեմին զգալի հարված են հասցնում ՀՀԿ-ի դիրքերին։ Ավելին, եթե հանրապետականները շարունակեն ձեռքերը ծալած նստել և ինչ-որ հակահարձակումներ չձեռնարկեն, քաղաքական դաշտում փրկվելու նրանց հնարավորությունները կզրոյանան, նշեց մեր զրուցակիցը։
Նրա խոսքով՝ առայժմ ՀՀԿ-ն զիջում է դիրքերը, և միակ փրկությունը կարող է լինել կուսակցության արմատական ռեբրենդինգը։
