ԵՐԵՎԱՆ, 23 հունիսի — Sputnik. Բուլղարիայի Պլիսկա քաղաքի «Կիրիլիցայի այգին» նոր քանդակով է զարդարվել, հայտնում է «Էպիկենտրոնը»։
Քանդակագործ Վեժդի Ռաշիդովը «Այգուն» Պաիսի Հիլենդարսկու կիսանդրին է նվիրել։ XVIII դարում թուրքական լծի թեժ ժամանակահատվածում հայր Պաիսին «Սլավոնա-բուլղարական պատմություն» վերնագրով մեծ աշխատություն էր գրել, այն կարևոր ուղեցույց էր ազգի ինքնագիտակցության պահպանման գործում։ Ինչո՞ւ ես ամաչում բուլղարացի կոչվել և կարդալ սեփական լեզվով` գրքի ամենահայտնի արտահայտություններից մեկն է։
Վեժդի Ռաշիդովը Բուլղարիայի ամենահայտնի քանդակագործներից մեկն է։ Երկար ժամանակ զբաղեցնում էր մշակույթի նախարարի պաշտոնը, այժմ գլխավորում է մշակույթի խորհրդարանական հանձնաժողովը։ Ազգությամբ էթնիկ թուրք Ռաշիդովն իր արվեստի մեջ միավորել է թուրքական և սլավոնական մոտիվները։
Իսկ «Կիրիլիցայի այգի» պատմամշակութային համալիրի հեղինակը գործարար Կարեն Ալեքսանյանն է։ Այստեղ նա հավաքել է կիրիլիցայի տառերի քանդակները, այնուհետև գրողների ծառուղի բացել, որտեղ կենտրոնացրել է բուլղարական գրականության դասականներին։
Ռաշիդովին անձամբ նա էր խնդրել քանդակ կերտել, այն պաշտոնապես բացեցին օրեր առաջ՝ չորս այլ քանդակների հետ միասին։ Մնացած քանդակները նվիրել է 84-ամյա թոշակառու էնտուզիաստ Յորդանկա Սավովան՝ նախկինում ուսուցչուհի և հայտնի գավառագետ։
Բացման արարողության ժամանակ Ռաշիդովը երախտիքի խոսքեր է ասել երկուսին։ «Հիանում եմ այն ոգեշնչմամբ, որով դուք ձեզ նվիրել եք այդ ազնիվ գործին։ Բուլղարիան ձեր նմանների կարիքն ունի»։
Հենց այդ պատճառով էլ, խոստովանել է Ռաշիդովը, ինքը չի կարողացել մերժել Ալեքսանյանին, երբ վերջինս խնդրել է նրան լուսավորչի քանդակը ստեղծել։
«Ալեքսանյանը լուսավոր և ճիշտ գործ է անում, նա հանրահռչակում է մեր այբուբենը, որը համախմբել է սլավոններին։ Հայը օրինակ է ցույց տալիս, թե ինչպես է պետք պահպանել հոգևոր արժեքները», — եզրափակել է Ռաշիդովը։
