ԵՐԵՎԱՆ, 22 հունիսի — Sputnik. «Ոսկու աշխարհ» տոնավաճառի տարածքի ավելի քան 20 աշխատողներ ուրբաթ օրը բողոքի ակցիա են կազմակերպել։
Ինչպես հաղորդում է Sputnik Արմենիայի թղթակիցը դեպքի վայրից, հավաքվածները բողոքում են առևտրի կենտրոնի փոքր սրահում վաճառակետերի վարձակալության գումարը բարձրացնելու դեմ։
2018թ–ի հունվարից վաճառակետի վարձակալության գումարը ամսական 35 հազար դրամից բարձրացրել են մինչև 50 հազար դրամ։ Այնուհետև նվազեցրել են 20 տոկոսով, այսինքն մինչև 40 հազար դրամ, սակայն փոքր սրահի առևտրականներին թույլ են տվել մինչև հուլիս վճարել 35 հազար։
Բանն այն է, որ 2017թ–ի հոկտեմբերից փոքր սրահում տարվել են վերանորոգման աշխատանքներ, ինչի պատճառով այցելուների թիվը կրճատվել է։ Ինչպես պնդում են ցուցարարները, դա անհավասար մրցակցային պայմաններ է ստեղծել` խիստ ազդելով նրանց եկամուտների վրա։
Չնայած զիջումներին, որոնք գնացել է կենտրոնի ղեկավարությունը, փոքր սրահի առևտրականներն իրենց խաբված և վիրավորված են զգում։
«Հարցն այն է, որ մեզ չպետք է համեմատեն մեծ սրահի առևտրականների հետ, մենք հոկտեմբեր ամսից ավելի քիչ ենք վաստակում։ Մենք խնդրում ենք, որպեսզի մեզ 20 տոկոս զեղչ տրամադրեն մեր 35 հազարից։ Վերանորոգման պատճառով առևտուր չկա։ Մենք հազիվ ենք վճարում վարձակալության գումարը», – լրագրողների հետ զրույցում բողոքեց Նարինե Աբրահամյանը։
Այդ ընթացքում մեծ սրահի աշխատողները տարակուսանքի մեջ էին. նրանք չէին հասկանում, թե ինչպես կարելի է «բազար» անել 10 դոլարի պատճառով։
«Մենք չենք բողոքում։ Ամոթ է, աղջիկ ջան։ Ամո՛թ։ Ինչո՞ւ են նրանք ուզում փչացնել մեր աշխատանքը», – Sputnik Արմենիայի թղթակցի հետ զրույցում ասաց մեծ սրահի աշխատող Անահիտը։
Տոնավաճառի տնօրեն Վաղարշ Աբրահամյանին փոքր սրահի աշխատողերի գործողությունները զայրացրել են։
«Ում դուր չի գալիս, թող հեռանա։ Մենք 28 տարի առաջ սահմանել ենք 35 հազար դրամ տեղի վարձ, այսօր այն պայմանները չեն, որպեսզի նույնքան վճարեն։ Ամեն ինչ թանկացել է», – լրագրողների հետ զրույցում ասաց Աբրահամյանը։
Նա պնդում է, որ մարդիկ ինքնակամ ստորագրել են վարձակալության մասին պայմանագիրը` համաձայնելով վճարել 50 հազար, բայց տնօրինությունն ամեն դեպքում չի գնացել զիջումների։
«Ես չեմ ուզում մոնոպոլիստ լինել։ Դուր չի գալիս, թող գնան` ուր ուզում են», – բարկացած ասաց Աբրահամյանը։
Որոշ ժամանակ անց մեծ սրահի առևտրականների մի մասը նույնպես միացան գործադուլին` ի նշան համերաշխության, հաղորդում է Sputnik Արմենիան։
Տոնավաճառում աշխատում են մինչև երկու հազար վերավաճառողներ և ոսկերիչներ։
