ԵՐԵՎԱՆ, 22 հունիսի — Sputnik, Լաուրա Սարգսյան. Վրաստանի քաղաքացիության վերականգնումը մոտ ժամանակներս կդադարի խնդիր լինել այլ քաղաքացիություն ստացած, այդ թվում Հայաստանի քաղաքացիություն ստացած, մի շարք վրացահայերի համար։ Մեկ այլ երկրի անձնագիր ունենալու համար Վրաստանում քաղաքացիությունից չեն զրկի, Sputnik Արմենիայի թղթակցին ասաց Վրաստանի հարցերով փորձագետ Ջոննի Մելիքյանը։
Վրաստանում 2018 թվականի հոկտեմբերին կայանալիք նախագահական ընտրություններից հետո, նոր Սահմանադրության հետ մեկտեղ, ուժի մեջ կմտնեն «Քաղաքացիության մասին» օրենքում արված փոփոխությունները։ Արդյունքում կպարզեցվի Վրաստանի քաղաքացիության (որ կորցրել էին Վրաստանում ծնված քաղաքացիները երկրորդ երկրի անձնագիր ստանալու ժամանակ, նրանց թվում շատ հայեր կան) վերականգնման ընթացակարգը։
Բացի այդ, ինչպես լրագրողների հետ զրույցում նշեց Վրաստանի ԱԳՆ սփյուռքի հետ կապերի դեպարտամենտի ղեկավար Ռատի Բրեգաձեն, փոփոխություններն ուժի մեջ մտնելուց հետո Վրաստանի բնակիչներին այլևս չեն զրկելու քաղաքացիությունից երկրորդ անձնագիր ունենալու պատճառով։
«Երբ երկրի սահմանադրությունն ուժի մեջ մտնի, Վրաստանի օրենսդրությամբ նախատեսվելու է նաև երկքաղաքացիության առկայությունը։ Այդ հարցը պարբերաբար բարձրացվում է, սակայն այստեղ կարևոր է հասկանել, թե ինչ մեխանիզմներով են առաջնորդվելու Վրաստանում կորցրած քաղաքացիությունը ստանալու համար», — ասաց Մելիքյանը։
Փորձագետը դրական է գնահատում նոր փոփոխությունները, քանի որ Վրաստանն այդպիսով հանում է «խոչընդոտները» երկրի բնակիչների, այդ թվում նաև հայերի համար։
Սահմանադրության մեջ արված փոփոխությունների հաստատումը դրական են մեկնաբանում նաև հայկական համայնքի ներկայացուցիչները։
Նշենք, որ Վրաստանի բնակիչները 2011 թվականից սկսած օտար երկրի անձնագիր ստանալու դեպքում մեխանիկորեն զրկվում էին Վրաստանի քաղաքացիությունից։ Ընդ որում, Վրաստանի արդարադատության նախարարությունը բազմիցս մերժել է մի շարք մարդկանց, որոնք դիմել են քաղաքացիությունը վերականգնելու համար։
Արգելքից հատկապես տուժել է Վրաստանի հայաբնակ Սամցխե-Ջավախքը։
2008 թվականի օգոստոսյան պատերազմից հետո Ռուսաստանը և Վրաստանը խզել են դիվանագիտական հարաբերությունները, սակայն Մոսկվան քաղաքացիների համար վիզային ռեժիմ է սահմանել Վրաստանի քաղաքացիների համար դեռևս 2000 թվականին։ Վրաստանի` ազգությամբ հայ քաղաքացիները տարածաշրջանում ծանր տնտեսական իրավիճակի պատճառով դիմել են Հայաստանի քաղաքացիություն ստանալու համար, և ստանալով այն, անխոչընդոտ մեկնել են Ռուսաստան` գումար աշխատելու։
Պաշտոնական տվյալների համաձայն` վերջին 7 տարիների ընթացքում երկրորդ քաղաքացիություն ունենալու պատճառով անձնագրերից զրկվել են Վրաստանի 30 հազար քաղաքացի, որոնց մոտ 80%-ը էթնիկ հայեր են։ Ոչ պաշտոնական տվյալների համաձայն` վերջին տասնամյակի ընթացքում այլ երկրների (գերազանցապես Հայաստանի և Ռուսաստանի) քաղաքացիություն են ստացել Վրաստանի մոտ մեկ միլիոն քաղաքացի։
Երկքաղաքացիության արգելքը տարածվում էր նաև Վրաստանի առաջին դեմքերի վրա։ 2012 թվականին, դեռ մինչև իշխանության գալը, վրացական քաղաքացիությունից զրկվել էր Վրաստանի ապագա վարչապետ Բիձինա Իվանիշվիլին` սահմանը ֆրանսիական անձնագրով հատելու համար, իսկ Միխեիլ Սահակաշվիլին զրկվել էր վրացական անձնագրից Ուկրաինայի քաղաքացիության պատճառով։
