ԵՐԵՎԱՆ, 21 հունիսի — Sputnik. «Կոնդի առանձնատների տնտեսություն» ՊՈԱԿ-ի տարածքի կառավարական առանձնատների սպառած ջրի կուտակած պարտքը հասնում է 54 մլն դրամի։ Նիկոլ Փաշինյանը հանձնարարել է, որպեսզի այն վճարվի: Այս մասին վարչապետը ասել է «Վեոլիա» ընկերության Կենտրոնական և Արևելյան Եվրոպայի երկրների գծով գործադիր փոխնախագահ Մալիկա Գենդուրիին` այսօր կառավարությունում կայացած հանդիպման ժամանակ։
Կարևորելով «Վեոլիա» ընկերության գործունեությունը մեր երկրում` վարչապետը հույս է հայտնել, որ ՀՀ կառավարության և ընկերության միջև կձևավորվի սերտ համագործակցություն՝ ջրային արդյունավետ քաղաքականություն իրականացնելու ուղղությամբ: Փաշինյանն անհրաժեշտ է համարել ջրի կորուստների ծավալները նվազեցնելու ուղղությամբ հետևողական քայլեր իրականացնելն ու հավելել, որ դա կնպաստի նաև սակագնային արդյունավետ քաղաքականությանը:
Մալիկա Գենդուրին վստահություն է հայտնել է, որ Հայաստանում տեղի ունեցած փոփոխություններից հետո ՀՀ նոր կառավարության հետ կծավալվի փոխշահավետ համագործակցություն, ինչը կնպաստի «Վեոլիա ջուր» ընկերության կողմից մատուցվող ծառայությունների մակարդակի բարձրացմանը, ստանձնած պարտավորությունների կյանքի կոչմանը:
Նիկոլ Փաշինյանը շեշտել է, որ կառավարությունը շահագրգռված է, որպեսզի «Վեոլիա ջուրն» ավելի շատ ներդրումներ իրականացնի և իր համար ապահովի ավելի մեծ եկամուտներ: «Վստահեցնում եմ, որ մեր կառավարության գործունեության ընթացքում չեք բախվի վարչապետի շահերին, այլ կբախվեք միայն քաղաքացիների շահերի պաշտպանությանը»,- ասել է Նիկոլ Փաշինյանը և ֆրանսիական ընկերությանն առաջարկել ձևավորել համատեղ աշխատանքային խումբ, որը կքննարկի բոլոր խնդիրներն ու կներկայացնի դրանց լուծման հստակ առաջարկություններ:
Հիշեցնենք, որ «Կոնդի առանձնատների տնտեսություն» ՊՈԱԿ–ի կառավարան լիազորությունները այս տարվա ապրիլից ՀՀ նախագահի աշխատակազմից փոխանցվել է ՀՀ կառավարության աշխատակազմին:
