ԵՐԵՎԱՆ, 20 հունիսի — Sputnik. «Ծառուկյան» դաշինքի պատգամավոր Նաիրա Զոհրաբյանն իրական չի համարում Հայաստանում մինչև տարեվերջ արտահերթ ընտրությունների անցկացումը։ Այդ մասին նա այսօր ասաց ԱԺ-ում լրագրողների հետ զրույցում` մեկնաբանելով Նիկոլ Փաշինյանի նոր հանձնաժողովի քարտուղար Դանիել Իոաննիսյանի հետ հանդիպումը։
Հանձնաժողովը Հայաստանի կուսակցությունների հետ կքննարկի ընտրական բարեփոխումների նախագիծը։ ՀՀԿ-ն արդեն հրաժարվել է քննարկումներից։
Ընտրությունների ժամկետները որոշելու համար անհրաժեշտ է բոլոր քաղաքական ուժերի համերաշխությունը։ Իսկ այդ հարցն առայժմ չի քննարկվել, նշեց Զոհրաբյանը։
«Դա արդեն մեր առաջին հանդիպումը չէ։ Մենք համաձայնության ենք եկել գրեթե բոլոր առանցքային հարցերում։ Գլխավոր հարցը թեկնածուների տարածքային ռեյտինգային ցուցակները չեղյալ հայտարարելն է, որպեսզի քվեարկությունն ընթանա միայն համամասնական համակարգով»,- ասաց պատգամավորը։
Քննարկվում է նաև մեկ այլ հարց` կրկնակի քվեարկությունը բացառելը։ Դրա համար առաջարկվում է վերցնել մատնահետքերը։
Առայժմ ոչ բոլոր քաղաքացիներն են ստացել անձնագրեր կամ նոր նմուշի ID քարտեր` կենսաչափական տվյալներով։ Ուստի մատնահետքեր պետք է վերցնել հենց ընտրատեղամասերում։
«Հիմա մենք քննարկում ենք, թե ինչպես կարելի է դա անել։ Տարբերակներից մեկն է թանաքի փոխարեն թափանցիկ սփրեյ ցանել մատներին», — նշեց Զոհարբյանը։
Բացի այդ, քննարկվում է որոշ ընտրախախտումները վարչականից քրեական դարձնելու հնարավորությունը։
«Վերջապես, մենք մտածում ենք հրաժարվել գրիչներից, որովհետև որոշ հեռավոր շրջաններում բնակչությունը դեռ հավատում է այն լուրերին, որ գրիչներում թաքնված են տեսախցիկներ, որոնք ֆիքսում են` ով և որտեղ է նշում անում։ Բավական է այն, որ ընտրողը ծրարի մեջ դնի տվյալ իր նախընտրած քաղաքական ուժի, դաշինքի քվեաթերթիկը», — ասաց Զոհրաբյանը։
Այս և այլ գաղափարները կքննարկվեն առաջիկա օրերին Ստրասբուրգում Եվրոպայի խորհրդի վենետիկյան հանձնաժողովի ներկայացուցիչների հետ։ Զոհրաբյանն այնտեղ կմեկնի այս կիրակի։
