ԵՐԵՎԱՆ, 18 հունիսի — Sputnik. Ազգային ժողովի պատգամավոր Մանվել Գրիգորյանի պատկանող տարածքում հայտնաբերված սեփական վկայականները ԱԱԾ-ն դեռ մանրամասն չի ուսումնասիրել, բայց ծառայության տնօրեն Արթուր Վանեցյանն այսօր կառավարության արտահերթ նիստի ավարտին լրագրողներին հայտնեց, որ դրանք Գրիգորյանի ընտանիքի անդամներին պատկանող մասնավոր ունեցվածքի վկայականներն են։
Ինչ վերաբերում է Մանվել Գրիգորյանի առանձնատան ավտոկայանում հայտնաբերված, բանակին նվիրաբերված ավտոմեքենաներին, ԱԱԾ պետը հայտնեց, որ դրանց նվիրատուները տեսանյութից են տեղեկացել, որ իրենց նվերները հասցեատիրոջը չեն հասել։
«Դրանց տերերն արդեն իսկ հայտնվել են և զանգահարել։ Իրենք չգիտեին, որ իրենց նվերները տեղ չեն հասել»,-ասաց նա
Լրագրողների հարցին, թե կոռուպցիոն աղմկոտ բացահայտումները չեն սպառնո՞ւմ արդյոք իր անձնական անվտանգությանը, Վանեցյանը պատասխանեց.
«Ստանում ենք տեղեկություններ, որ որոշ խմբեր փորձում են ինչ-որ բաներ անել, փորձում են վնասազերծել, բայց դա չի ստացվի»։
Զրույցի ավարտին Վանեցյանը կոչ արեց Հայաստանի բնապահպաններին` գնալ, տեր կանգնել Մանվել Գրիգորյանի կենդանիներին, քանի որ պահածոների առգրավումից հետո նրանք կարող են սոված մնալ։
Հիշեցնենք, որ հունիսի 16-ին ՀՀ ԱԱԾ-ն ձերբակալեց ԱԺ պատգամավոր, գեներալ-լեյտենանտ Մանվել Գրիգորյանին, ապօրինի զենք-զինամթերք և զինվորների համար նախատեսված պարենամթերք պահելու մեղադրանքով։ ՀՀ կառավարության հունիսի 18-ի նիստում որոշում կայացվեց հունիսի 19-ին գումարել ԱԺ արտահերթ նիստ, որում քննարկման կդրվի պատգամավոր Մանվել Գրիգորյանին անձեռնմխելիությունից զրկելու հարցը: Կառավարության որոշման մեջ նշվում է, որ արտահերթ նիստում քննարկման կդրվի Գրիգորյանի նկատմամբ քրեական հետապնդում հարուցելուն և նրան ազատությունից զրկելուն համաձայնություն տալու մասին Հայաստանի Հանրապետության գլխավոր դատախազի միջնորդագիրը:
Գրիգորյանի նկատմամբ քրեական գործ է հարուցվել ապօրինի զենք-զինամթերք պահելու կասկածանքով։ Պատգամավորի ձերբակալության մասին համապատասխան կարգով տեղեկացվել է ԱԺ նախագահ Արա Բաբլոյանը։
ԱԱԾ-ն հունիսի 17-ին տեսանյութ է հրապարակել` ներկայացնելով ՀՀ Արմավիրի մարզի Արշալույս գյուղի Լճափնյա փողոցում գտնվող, Մանվել Գրիգորյանին սեփականության իրավունքով պատկանող հանգստյան գոտում, ինչպես նաև Էջմիածին քաղաքի Ալավերդյան փողոցի տուն 46 հասցեում տեղակայված և Գրիգորյանին պատկանող առանձնատան կատարված խուզարկության արդյունքները:
Տեսանյութում երևում է, որ Մանվել Գրիգորյանին պատկանող հանգստյան գոտին վերածվել էր զինապահեստի, ռետրո և ժամանակակից տասնյակ ավտոմեքենաների ավտոպարկի: Ակնալճի ամառանոցը գեներալի համար ծառայել է նաև «զինվորի բաժին» նշագրումով սննդի, հիգիենիկ պարագաների, դեղորայքի, զինվորական հանդերձանքի պահեստարանի: Զինվորներին հասցեագրված արկղերին կից նամակներից ակնհայտ էր, որ արկղերի պարունակությունը դեռևս 2016-ին ապրիլյան քառօրյա պատերազմի օրերին ուղարկված օգնությունն էր առաջնագծի զինվորներին: Զինվորական շապիկներ, գուլպաներ, դեղորայք, բինտեր, վիրակապեր դեղահաբեր…
Գրիգորյանն այս պահին ձերբակալված է։ Նրա որդին` Կարեն Գրիգորյանը, հրաժարվել է Էջմիածնի քաղաքապետի պաշտոնից։
