ԵՐԵՎԱՆ, 18 հունիսի – Sputnik. Վայրի բնության և մշակութային արժեքների պահպանման հիմնադրամը (FPWC), Երևանի կենդանաբանական այգու աշխատակիցներն ու բնապահպանական և ընդերքի տեսչական մարմնի աշխատակիցներն այս պահին Էջմիածնում են` ձերբակալված պատգամավոր Մանվել Գրիգորյանին պատկանող առանձնատան տարածքում։
Ֆեյսբուք սոցիալական ցանցի ուղիղ եթերում երևում են Գրիգորյանին պատկանող արջերն ու վագրերը։
Նշենք, որ ավելի վաղ Վայրի բնության և մշակութային արժեքների պահպանման հիմնադրամը (FPWC) հայտարարել էր, որ պատրաստ է սեփական միջոցներով կատարել ԱԺ պատգամավոր Մանվել Գրիգորյանին պատկանող տարածքում պահվող վայրի կենդանատեսակների անվտանգ տեղափոխումը համապատասխան մասնագիտացված տարածք: Երևանի կենդանաբանական այգին էլ իր հերթին հայտարարել էր, որ պատրաստ է աջակցել Գրիգորյանի կենդանիների փրկությանը։
