ԵՐԵՎԱՆ, 18 հունիսի – Sputnik. Գեներալ Մանվել Գրիգորյանը Արցախի հերոս է, սակայն Հայաստանում անձեռնմխելի մարդիկ չկան։ Այս մասին ԱԺ ճեպազրույցի ժամանակ ասաց ՀՅԴ խմբակցության ղեկավար Արմեն Ռուստամյանը։
2016 թվականի ապրիլի դեպքերից հետո Արցախում պատգամավորները եղել են առաջնագծում և ծանոթացել զինվորների մատակարարումներին։ Այդ ամենը խայտառակ մակարդակի էր, ավելացրեց Ռուստամյանը։ Այդ ժամանակ սկսվեց խախտումների ուսումնասիրության գործընթացը, սակայն, ինչպես երևում է, անձեռնմխելի անձինք են եղել։
«Ուրախ եմ, որ մեր երկրում տեղի ունեցած վերջին իրադարձությունները կվերացնեն անձեռնմխելիությունը։ Այդ ժամանակ ոչ ոք չի կարողանա թաքնվել ժողովրդից, և ոչ ոք ամենաթողություն չի ունենա», – ասաց Ռուստամյանը։
Հիշեցնենք, որ հունիսի 16–ին ՀՀ ԱԱԾ–ն ձերբակալեց ԱԺ պատգամավոր, գեներալ Մանվել Գրիգորյանին, ապօրինի զենք–զինամթերք և զինվորների համար նախատեսված պարենամթերք պահելու մեղադրանքով։ Նրան պատգամավորական անձեռնմխելիությունից զրկել կարող են միայն ԱԺ հերթական (և ոչ արտահերթ) նիստի ժամանակ։ Արտահերթ նիստը մեկնարկում է հունիսի 19-ին, իսկ հերթականը կգումարվի ոչ շուտ, քան սեպտեմբերի 10-ը։
