ԵՐԵՎԱՆ, 16 հունիսի — Sputnik. ՀՀ մշակույթի նախարարությունը նախատեսում է ստեղծել մշակութային շարժական հարթակ, որը նաև գրադարան կներառի։ Շիրակի մարզպետ Կարեն Սարուխանյանի հետ հանդիպման ժամանակ այս մասին ասաց այսօր Գյումրի այցելած Լիլիթ Մակունցը։
Նրա խոսքով` գրադարանն իր մեջ կներառի նաև ժամանակակից գրողների ստեղծագործությունները։ Մարզպետն առաջարկեց գրադարանում ներառել նաև շիրակցի գրողների ստեղծագործությունները։
Նախարարը մարզպետարանից շարժվեց 19-րդ դարի կառույց հանդիսացող Սպիտակ հիվանդանոցի շենք, այնուհետև Գյումրու Գյուլբենկյանի անվան հիվանդանոց, որն այժմ չի գործում։
Նշենք, որ Գյումրու ավագանու անդամ, Ժուռնալիստների խորհրդի անդամ Լևոն Բարսեղյանն ավելի վաղ նախարարին էր դիմել դատարկ կառույցը Գյումրու երկրագիտական թանգարանին հանձնելու առաջակով։ Լրագրողների հետ ունեցած ճեպազրույցի ժամանակ կնախարարը նշեց, որ այս հարցը մշակույթի նախարարության առաջնային ուշադրության կենտրոնում կլինի։
Մակունցը վստահեցրեց, որ հնարավորության դեպքում նախարարությունը կփորձի լուծել նաև Գյումրու համերգային դահլիճի հարցը։ Մշակութային Գյումրին այս պահին չափորոշիչներին համապատասխան համերգային դահլիճ չունի։
Նախկին նախարար Արմեն Ամիրյանը հավանություն էր տվել Գյումրու Սևյանի անվան նախկին պալատը վերանորոգելու և որպես համերգային դահլիճ ծառայեցնելու առաջարկին։ Մակունցը նշեց, որ կվերանայվեն նախկինում եղած բոլոր ծրագրերը և հնարավորության դեպքում դրանք կյանքի կկոչվեն ըստ առաջնահերթության։
Անդրադառնալով մարզերից Երևան տեղափոխված հուշարձանային բեկորներին և հատկապես Մինասի որմնանկարներին` նախարարը խոստացավ վերադարձնել դրանք «ծննդավայր» որոշակի ժամանակ անց, քանի որ այդ հարցերը միանգամից լուծում չեն կարող ստանալ. որոշակի գործընթաց և քննարկումներ են պետք։
Այցի շրջանակում նախարարը եղավ նաև Սև բերդ ամրոցում, ինչպես նաև մարզային գրադարանում։
Մակունցը շարունակում է ծանոթանալ Գյումրիին ու քաղաքի մշակութային խնդիրներին։
