Հայաստանի առողջապահության նախարարությունը դեռ չի որոշել, թե պարտադիր բժշկական ապահովագրության որ մոդելն է ամենից շատ համապատասխանում Հայաստանին։ Այս մասին լրագրողների հետ հանդիպմանն ասաց Հայաստանի առողջապահության նախարար Արսեն Թորոսյանը։
«Մենք հրավիրել ենք մասնագետների, որպեսզի հասկանանք, թե բուժապահովագրման որ մոդելն է ամենից շատ համապատասխանում մեզ», — ասաց Թորոսյանը։
Նրա խոսքով՝ մի դեպքում մեզ մոտ կլինի ամերիկյան առողջապահություն, մյուս դեպքում՝ եվրոպական։ Երկու դեպքում էլ կան ռիսկեր ինչպես պետության, այնպես էլ հասարակության համար։ Նա հակված է երկրորդ մոդելին։
Ամերիկյան մոդելի դեպքում քաղաքացին ինքը պետք է հոգ տանի իր առողջության մասին։ Եթե քաղաքացին լավ աշխատանք և կայուն եկամուտ ունի, նա ի վիճակի է գնել (գործատուից ստանալ) բժշկական ապահովագրություն և անցնել անհրաժեշտ բուժումը։
Եվրոպականը ենթադրում է պարտադիր բժշկական ապահովագրության ներմուծում։ Միաժամանակ բժշկական ծառայությունների ֆինանսավորումը պետության սոցիալական երաշխիքների մակարդակում է, իսկ ապահովագրական վճարի չափը կապված չէ բժշկական օգնության և ապահովագրվածի առողջական վիճակի հետ։
Նախարարը նշեց, որ շուտով այդ հարցը կդրվի հանրային քննարկման։
Նախարարը հույս ունի, որ բժշկական ապահովագրության պարտադիր համակարգը Հայաստանում կներդրվի մինչև 2021թ-ը։
