ԵՐԵՎԱՆ, 15 հունիսի — Sputnik. «Դուխով» (այս համատեքստում, համարձակ, սկզբունքային – խմբ.) երկու մարդիկ` ՀՀ վարչապետ Նիկոլ Փաշինյանն ու հրաժարական ներկայացրած աշխատանքի և սոցիալական հարցերի նախարար Մանե Թանդիլյանը պետք է բանակցությունների սեղանի շուրջ նստեն և լուծեն տարաձայնությունները։ Թանդիլյանը պետք է վերադառնա։
Այս մասին լրագրողների հետ զրույցում այսօր ասաց «Մարդկային զարգացման կենտրոն» ՀԿ նախագահ Թևան Պողոսյանը։
Թանդիլյանը հունիսի 12-ին հրաժարական տվեց նախարարի պաշտոնից և դուրս եկավ «Լուսավոր Հայաստան» կուսակցությունից` բացատրելով իր քայլը ավելի վաղ ընդունված «Կուտակային կենսաթոշակների մասին» օրենքի հետ համաձայն չլինելով։ Օրենքը ենթադրում է 2018 թվականի հուլիսի 1-ից սոցիալական վճարների պարտադիր բաղադրիչի կիրառում։ Թանդիլյանն առաջարկում էր հետաձգել պարտադիր բաղադրիչի կիրառումը մեկ տարով և հանրային քննարկումներ անցկացնել։ Սակայն կառավարությունը, նախարարի դիրքորոշմանը հակառակ, այլ որոշում ընդունեց և մտադիր է ներդնել համակարգը հուլիսի 1-ից։
«Մանե Թանդիլյանին կոչ եմ անում քննարկել ամեն ինչ և վերադառնալ իր պարտականությունների կատարմանը։ Քանի որ սոցիալական ոլորտը, որի համար նա պատասխանատու է, կուտակային համակարգով չի սահմանափակվում», – ասաց Պողոսյանը։
Նրա խոսքով` վարչապետի քաղաքականությունը փոխզիջումների հասնելն է։ Նա կուտակային համակարգի խնդիրը ժառանգություն է ստացել նախորդ կառավարությունից։
«Այո, լավ է, որ մենք նման «դուխով» նախարար ունենք, սակայն ուրախ եմ, որ նաև նույնքան «դուխով» վարչապետ ունենք, որը չվախեցավ իր վրա պատասխանատվություն վերցնել։ Ուրախ կլինեմ, եթե «դուխով» տղամարդն ու կինը կարողանան բանակցությունների սեղան նստել և ճիշտ ճանապարհ գտնեն», – ասաց Պողոսյանը։
Փորձագետը կարծում է, որ կուտակային համակարգն արդարացնում է իրեն։ Ու թեև Պողոսյանը այն քաղաքացիների շաչքում չէ, որոնց վրա ակամա տարածվում է պարտադիր բաղադրիչը, նա կամավոր է միացել համակարգին։
«Երազում եմ երկար ապրելու, թոռներիս ու երեխաներիս հետ լավ ապրելու մասին։ Չեմ ուզում ծերությանս տարիներին նրանց ուսերին բարդել ինձ ապահովելու պատասխանատվության մի մասը», – ասաց Պողոսյանը։
Հիշեցնենք, որ կուտակային կենսաթոշակային համակարգում ամեն դեպքում որոշակի փոփոխություններ մտցվել են։
Թեև Հայաստանում կուտակային կենսաթոշակները պարտադիր կդառնան, սակայն քաղաքացիներն ավելի քիչ կվճարեն։ «Կուտակային կենսաթոշակների մասին» օրենքում համապատասխան փոփոխությունների նախագիծը հավանության է արժանացել հունիսի 11-ի կառավարության արտահերթ նիստում։ Այժմ փոփոխությունները պետք է հաստատի խորհրդարանը. նախատեսվում է, որ դրանք ուժի մեջ կմտնեն։
Այսօր աշխատող քաղաքացիների աշխատավարձից կենսաթոշակի համար գանձվում է 10%, որից 5%–ը վճարում է քաղաքացին, ևս 5%–ը պետբյուջեից է վճարվում։ Այժմ այս համադրությունն ուզում են դարձնել 2,5% / 7,5%, ավելացնելով բյուջեի կողմից վճարվող մասը։
