ԵՐԵՎԱՆ, 14 հունիսի — Sputnik. Ավտոմեքենաների տեխնիկական զննությամբ զբաղվող մի շարք կազմակերպություններ կեղծված փաստաթղթերով պետական բյուջեից խաբեությամբ 1.031.330.000 դրամ են յուրացրել։
Դեպքը բացահայտել է Ոստիկանության կազմակերպված հանցավորության դեմ պայքարի գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչությունը։
Տեխզննման լիցենզիա ունեցող ընկերությունները, ըստ ոստիկանության, 2015-2018թթ ընթացքում ավտոմեքենաների տեխնիկական զննման դիմաց նախատեսված 5500-10.500 դրամի կտրոններ են դուրս գրել, բայց մեքենաների փաստացի տեխնիկական զննում չեն իրականացրել։
Դրանից հետո կազմակերպությունների տնօրենները դրանք ներկայացրել են ֆինանսների նախարարություն և խաբեությամբ, չկատարված աշխատանքների դիմաց պետական բյուջեից հափշտակել 1.031.330.000 դրամ:
Բացահայտված փաստերով ոստիկանությունում նյութեր են նախապատրաստվում:
