ԵՐԵՎԱՆ, 13 հունիսի — Sputnik, Լաուրա Սարգսյան. Armenia ավիաընկերության փոխտնօրեն Գևորգ Խաչատրյանը չի հաստատել լուրերն այն մասին, որ ինքը նշանակվելու է Հայաստանի Քաղավիացիայի գլխավոր վարչության պետի պաշտոնում։ Այս մասին նա ասաց Sputnik Արմենիայի թղթակցի հետ զրույցում։
Օրերս լրատվամիջոցները տեղեկություն էին տարածել այն մասին, որ Խաչատրյանը այդ պաշտոնի ամենահավանական թեկնածուներից է։
«Տվյալ պահին ես Armenia ավիաընկերությունում եմ աշխատում ու իմ ամենօրյա աշխատանքով եմ զբաղված։ Մենք պատրաստվում են Երևան–Թել–Ավիվ–Երևան, Երևան–Լիոն–Երևան վաղվա երկու չվերթներին», – ասաց Խաչատրյանը։
Հարցին` ինչ նա կփոխեր նշանակման դեմքում, Խաչատրյանը պատասխանեց` ով էլ լինի Հայաստանի Քաղավիացիայի գլխավոր վարչության պետ, նա պետք է առաջին հերթին զբաղվի հայկական ավիացիայի զարգացմամբ։
«Պետք է ավիացիայի աջակցման ու զարգացման ռազմավարություն մշակվի։ Դա նշանակում է, որ շուկայում պետք է լինեն հայկական ավիաընկերություններ, հայկական գրանցումով ինքնաթիռներ, կադրեր պետք է պատրաստվեն ու վերապատրաստվեն», – ասաց Խաչատրյանը` ընդգծելով, որ այդպես է պահանջում նաև տարածաշրջանի աշխարհաքաղաքական իրավիճակը։
Հիշեցնենք` հունիսի 8–ին Սերգեյ Ավետիսյանն ազատվել է Հայաստանի կառավարության կից Քաղավիացիայի գլխավոր վարչության պետի պաշտոնից։ Նրա հեռացման մասին հրամանը ստորագրել է վարչապետ Նիկոլ Փաշինյանը։
