ԵՐԵՎԱՆ, 12 հունիսի — Sputnik. Հայաստանի ֆուտբոլի հավաքականի ֆուտբոլիստ Հենրիխ Մխիթարյանը հույս ունի, որ իր թիմը կմասնակցի աշխարհի հաջորդ առաջնությանը, այս մասին ասել է «Կոմերսանտին» տված հարցազրույցում։
«Հուսամ` հաջորդ անգամ մենք էլ կլինենք, թեև, անկասկած, բարդ խնդիր է, քանի որ ազգային առաջնությունում հանդես եկող ֆուտբոլիստների համար դժվար է առաջընթացի հասնել։ Այնտեղ դու կարող ես քեզ աստղ զգալ, իսկ ավելի մրցունակ միջավայրում հայտնվելով` հասկանում ես իրական արժեքդ», — ասել է Մխիթարյանը։
Նրա խոսքով` որքան շատ ֆուտբոլիստներ խաղան առաջատար եվրոպական առաջնություններում, այնքան լավ։
Ինչ վերաբերում է այս տարվա առաջնությանը մասնակցող Ռուսաստանի հավաքականին, ապա ֆուտբոլիստի խոսքով, թիմը բավականին բարդ, բայց նորմալ խմբում է հայտնվել Աշխարհի առաջնության եզրափակիչի համար։
«Այդպես կասեն ֆուտբոլից հասկացող փորձագետների մեծ մասը։ Միևնույն ժամանակ չեմ կասկածում, որ Ռուսաստանի հավաքականն արժանի խաղ կցուցադրի», — ասել է Մխիթարյանը։
Նա կարծում է, որ Աշխարհի առաջնության ֆավորիտներն են Ֆրանսիան, Իսպանիան, Գերմանիան, Բրազիլիան, Արգենտինան, Ուրուգվայը, Բելգիան, Խորվաթիան։
