ԵՐԵՎԱՆ, 12 հունիսի — Sputnik. Պարտադիր կուտակայինի հարցը կառավարության համար փակված չէ։ Այսօր ԱԺ-ում լրագրողների հետ զրույցում, մեկնաբանելով երեկ կառավարության նիստում իր և Նիկոլ Փաշինյանի միջև տեղի ունեցած բանավեճը` ասաց Տնտեսական զարգացման և ներդրումների նախարար Արծվիկ Մինասյանը` միաժամանակ դա համարելով «նորմալ աշխատանքային պրոցես»։
«Ես դեմ եմ եղել պարտադիր կուտակայինին, առայժմ շարունակում եմ մնալ դեմ, քանի դեռ հակառակի մեջ համոզված չեմ: Երեկվա նախագիծը ոչ թե պարտադիր կուտակայինը ներդնելու մասին էր, այլ հուլիսի մեկից ուժի մեջ մտնող նախագծի մեղմացման մասին»,- ասաց նախարարը:
Մինասյանը նշեց, որ առաջիկայում պարտադիր կուտակային բաղադրիչը քննարկման առարկա է դառնալու հատկապես դրա սահմանադրականության տեսակետից։
ԱԺ նիստի հայտարարությունների ժամին կուտակային համակարգին անդրադարձավ նաև «Ծառուկյան» խմբակցության պատգամավոր Գևորգ Պետրոսյանը։ «Պարտադիր կուտակային համակարգով խախտվում է մարդու սեփականության իրավունքը, որը Սահմանադրությամբ ամրագրված կարևոր սոցիալ-տնտեսական իրավունքներից մեկն է։ Մարդու սեփականությունը նրա կամքին հակառակ տնօրինելը հակասում է ՀՀ Սահմանադրությանն ու Մարդու իրավունքների միջազգային նորմերին»,-ասաց նա` հավելելով, որ պետությունը չպիտի իր հոգսը դնի քաղաքացիների վրա։
Պետրոսյանը կարևորեց այն, որ այս խմորումների հետևանքով ՀՀ նոր կառավարությունն իր վստահությունը քաղաքացիների մոտ չկորցնի։
Հիշեցնենք` երեկ ՀՀ կառավարությունն արտահերթ նիստում ընդունվեց կուտակային կենսաթոշակային պարտադիր համակարգում փոփոխություններ անելու մասին նախագիծը, որով առաջարկվում է գործող 5/5 համամասնության փոխարեն սահմանել 2.5/7.5 համամասնությամբ վճարում, այսինքն 2.5%-ը պետք է վճարի քաղաքացին, 7.5%-ը`պետությունը։ Նիկոլ Փաշինյանը նշեց, որ դրանով շահառու քաղաքացիների բեռը զգալի կնվազի, աշխատավարձերը որոշակի չափով կավելանան։
Տնտեսական զարգացման և ներդրումների նախարար Արծվիկ Մինասյանը դեմ արտահայտվեց նախագծին` նշելով, որ իր քաղաքական թիմը` ՀՅԴ-ն, սկզբունքորեն դեմ է պարտադիր բաղադրիչին, և ինքը սկզբունքորեն չի կարող կողմ լինել նախագծին։
Վարչապետ Փաշինյանին զայրացրեց նախարարի այս դիրքորոշումը։ Նա ասաց, որ ոչ ոք չպետք է դեմ քվեարկի ընդունվող որոշումներին։
Հուլիսի 1-ից ուժի մեջ մտնող կուտակային կենսաթոշակային համակարգի պարտադիր բաղադրիչը տարածվելու է 1974 թվականի հունվարի 1-ից հետո ծնված բոլոր աշխատողների համար։ Մինչև այդ համակարգին միացել էին պետական կառավարման համակարգի աշխատակիցները և նրանք, ովքեր մեկ տարի առաջ ինչ-ինչ պատճառով համակարգից հրաժարվելու դիմում չէին գրել։
