ԵՐԵՎԱՆ, 11 հունիսի — Sputnik. Երևանի ավագանու առաջիկա նիստում ներառվել է «Երեւան» հիմնադրամը լուծարելու հարցը: Այս մասին Facbook-ի իր էջում նշել է ՀՀ կրթության և գիտության նախարար Արայիկ Հարությունյանը:
«Հիշում եք, որ ամիսներ առաջ Լենա Նազարյանը և ես դատի էինք տվել Երևան հիմնադրամին մեզ անհրաժեշտ տեղեկություններ չտրամադրելու համար: Հիմնադրամի հոգաբարձուների խորհրդի նախագահը Տարոն Մարգարյանն է: Մեր ունեցած տեղեկություններով, այստեղ կարող էին լինել կոռուպցիոն սխեմաներ: Տեղեկությունների հավաստիությունը ստուգելու համար դիմել էինք դատարան, որի առաջին նիստը կկայանա հունիսի վերջին»,- գրել է նա։
Նախարարի խոսքով` երեկ իմացել է, որ առաջիկա ավագանու նիստում քննարկվելու է հիմնադրամի լուծարման հարցը:
«Բայց դե հիմնադրամ փակելով հետքերը դժվար է մաքրել»,- գրել է նա։
Հարությունն ընդգծել է, որ դատարանին նաև կմիջնորդեն կասեցնել լուծարումը, մինչև անհրաժեշտ տեղեկատվությունը տրամադրվի:
Նշենք, որ Արայիկ Հարությունյանն ու Ազգային ժողովի պատգամավոր Լենա Նազարյանը պահանջում են, որ «Երևան» հիմնադրամը տվյալներ տրամադրի այն մասին, թե վերջին երկու տարիների ընթացքում ովքեր են 100 հազար դրամ և ավելի գումար փոխանցել Հիմնադրամին: Արայիկ Հարությունյանն ավելի վաղ նշել էր՝ կասկածներ ունեն, որ Երևանի քաղաքապետարանի մատուցած ծառայությունների դիմաց, օրինակ՝ տարածքներ սեփականաշնորհելու, քաղաքացիները ոչ միայն պետական տուրքեր են վճարում, այլ նաև գումար են փոխանցում «Երևան» հիմնադրամին, որպես այսպես կոչված՝ «մաղարիչ»:
«Երևան» հիմնադրամը պետական գրանցում է ստացել 2007 թվականին, հոգաբարձուների խորհրդի նախագահն է քաղաքապետ Տարոն Մարգարյանը, խորհրդի կազմում են նաև քաղաքապետի տեղակալները, խորհրդականը, աշխատակազմի քարտուղարը, քաղաքապետարանի տարբեր վարչությունների պետեր, ինչպես նաև ավագանու անդամներ:
