ԵՐԵՎԱՆ, 10 հունիսի — Sputnik. Այսօր լեզվակռիվ և քաշքշոց է տեղի ունեցել Ամենայն Հայոց կաթողիկոս Գարեգին Բ–ի կողմնակից և նրա դեմ պայքարող հոգևորականների և հավատացյալների միջև։ Ինչպես մեզ դեպքի վայրից պատմեց պատարագին մասնակից ականատեսը, միջադեպը տեղի է ունեցել Երևանի Սուրբ Գրիգոր Լուսավորիչ եկեղեցու բակում, որտեղ կաթողիկոսը մասնակցում էր ձեռնադրման արարողությանը։
Արարողությունից հետո, երբ Վեհափառը պատրաստվում էր լքել եկեղեցին, նրա հրաժարականը պահանջողները` Հայր Կորյունի գլխավորությամբ, սկսեցին բղավել՝ ափսոս հայրապետ չունենք, Գարեգին, հեռացիր։
Կաթողիկոսին պաշտպանող հոգևորականերն էլ` իրենց կողմնակից հավատացյալների հետ միասին, ի պատասխան վանկարկում էին՝ Վեհափառ, վեհափառ։ Սրան հաջորդեց քաշքշուկ։
Կաթողիկոսը մի կերպ ճեղքեց հավաքվածներին, նստեց մեքենան ու, չպատասխանելով լրագրողի հարցին, արագ հեռացավ։
