ԵՐԵՎԱՆ, 10 հունիսի — Sputnik. «Ավրորա» մրցանակի համահիմնադիր Վարդան Գրեգորյանը պարզաբանել է՝ ինչու մրցանակային հիմնադրամի միջոցները չեն ներդնում Հայաստանի տնտեսության տարբեր սեկտորներում, այլ տրամադրում են առանձին անհատների, որոնք, թեև, անկասկած, վաստակ ունեն մարդասիրության գաղափարների սփռման գործում, այնուամենայնիվ, հեռու են հայկական իրականությունից։ Այսօր Երևանում մրցանակաբաշխության երրորդ արարողությունից հետո ասուլիսի ժամանակ Գրեգորյանը նշեց, որ «Ավրորան» բարձրացրել է Հայաստանի ճանաչելիությունն աշխարհում։
«Մեզ հաճախ են քննադատում, որ մենք չենք ուղղում այդ գումարները Հայաստանում այս կամ այն նախագծերի իրականացմանը։ Սակայն ուզում եմ ասել, որ Հայաստանին առանց դա էլ տարեկան միլիոնավոր դոլարներ են տրամադրվում։ Իսկ «Ավրորայի» գաղափարը բարձրացրել է Հայաստանի հեղինակությունը, բարձրացրել է դրա ճանաչելիությունը։ Մեզ զարմացրել է այն մեծ աջակցությունը, որ մենք ստանում ենք տարբեր երկրներից ու հայտնի անհատներից», — ասաց Գրեգորյանը։
«Ավրորան» մրցանակ է, որն ամեն տարի տրվում է սեփական կյանքը վտանգելով այլոց կյանքը փրկող մարդկանց։ Դափնեկիրը պարգևատրվում է այն բացառիկ ներդրման համար, որը նա ունենում է մարդկանց կյանքերը փրկելու ու մարդասիրության գաղափարն առաջ տանելու համար։ Aurora Prize-ը հանձնվում է Հայոց ցեղասպանության ժամանակ փրկված մարդկանց անունից` ի երախտագիտություն իրենց փրկողներին։
Այսօր ամենամյա «Ավրորա» մրցանակի երրորդ դափնեկիր է ճանաչվել իրավաբան և ակտիվիստ Չո Լա Աունը Մյանմայում ընդդեմ անարդարության և հանուն ռոհինջա ժողովրդի իրավունքների մղած պայքարում դրսևորած անհատական զոհողությունների համար: Նրա անունը՝ որպես դափնեկիր, հայտարարվել է Հայաստանում՝ արևածագին Արարատ լեռան ստվերի տակ տեղի ունեցած միջոցառման ընթացքում:
Հիշեցնենք, որ «Ավրորա» մրցանակը շնորհում է «Ավրորա» մարդասիրական նախաձեռնությունը Հայոց ցեղասպանության վերապրողների անունից`ի երախտագիտություն նրանց փրկողների։ Չո Լա Աունը «Ավրորա» մրցանակի 2018թ. դափնեկիր է ընտրվել 115 երկրից առաջադրված 750 թեկնածությունների ցանկից։
«Ավրորա» մրցանակի համահիմնադիրներն են՝ Վարդան Գրեգորյանը, Նուբար Աֆեյանը եւ Ռուբեն Վարդանյանը։
«Մենք կարծում ենք, որ հարյուր տարի սգալուց հետո ժամանակն է ուժեր գտնել, արթնանալ ու օգնել ուրիշներին, խրախուսել այն մարդկանց, որոնք հազարավոր հալածվածների ու կարիքավորների կյանքը փրկելու համար ռիսկի տակ են դնում սեփական կյանքը։ Այս անգամ ընտրեցինք իրավաբանի Մյանմայից, որը պաշտպանում էր խտրականության ու ճնշումների ենթարկվող ռոհինջա ժողովրդի իրավունքները» — ասաց Գրեգորյանը։
Նրա խոսքով՝ Չո Լա Աունը կարող էր որպես իրավաբան աշխատել որևէ հարմարավետ գրասենյակում, լինել Մյանմայի միջին վիճակագրական բնակիչ, զբաղվել սովորական փաստաբանական գործունեությամբ։ Բայց նա ընտրել է բարդ, սակայն հերոսական ճամփա, նա որոշել է առանձնանալ ու պայքարել մարդկանց իրավունքների համար։
