ԵՐԵՎԱՆ, 9 հունիսի — Sputnik. «Ավրորա 2017» մրցանակի դափնեկիր, բժիշկ Թոմ Քաթինան առաջին հերթին Երևանից բազում նվերներ է տանելու Քենիա։ Այս մասին նա ասաց լրագրողների հետ զրույցում՝ պատասխանելով Sputnik Արմենիայի հարցին։
Այսօր Քաթինան, նրա կինը՝ Նասիման, ու ՀՀ առողջապահության նախարար Արսեն Թորոսյանն այցելեցին Հայրենիքի պաշտպանի վերականգնողական կենտրոն, որը գտնվում է №1 «Հերացի» բժշկական համալիրի շենքում՝ Երևանի առաջին քաղաքային հիվանդանոցում։
«Ես այնքան նվերներ ստացա։ Կցանկանայի ուտելիքից ինչ-որ բան հետս վերցնել, օրինակ` խորոված, ժենգյալով հաց, պանիր, հաց, լոլիկ», — ժպիտով ասաց Քաթինան։
Քանի դեռ Թոմը Հայաստանում է, Քենիայում նրան փոխարինում են ամերիկացի երկու վիրաբույժները։ Նախորդ տարի հայաստանցի բժիշկներն էին Քենիա մեկնել, հակառակ դեպքում Քաթինան չէր կարող գալ․ նրան փոխարինող չկար։
Քաթինային ու նրա կնոջը վերականգնողական կենտրոնում զարմացրեց աղերի սենյակը։
«Քանի դեռ կան պատերազմներ, մեզ այսպիսի կենտրոններ են պետք։ Միակ բանը, որը կարող ենք անել՝ հոգ տանել նրանց մասին», — ասաց Քաթինան։ Նա կարծում է, որ միայն պատերազմների բացակայությունը կարող է օգնել լուծել վիրավորների խնդիրը։
Նա ընդգծեց, որ Քենիայում, ի տարբերություն Երևանի, այդպիսի կենտրոններ չկան, բայց կան բազում հիվանդներ, որոնք այդ կենտրոնների ու բուժման կարիք ունեն։
«Ավրորա 2017» մրցանակի դափնեկիր, բժիշկ Թոմ Քաթինան ու նրա կինը՝ Նասիման, Հայաստան են եկել «Ավրորա 2018» մրցանակաբաշխության միջոցառումներին մասնակցելու համար։
Նրանք այցելել են Ծիծեռնակաբերդ ու Հայոց ցեղասպանության թանգարան-ինստիտուտ։ Քաթինան խոստովանել է, որ հուշարձանն ու Հայոց ցեղասպանության թանգարան-ինստիտուտը հուզել են իրեն ու հիշեցրել սեփական ցավի մասին։
Հիշեցնենք` «Ավրորա» համաշխարհային մարդասիրական մրցանակի նպատակն է մեծարել մերօրյա հերոսներին այն բացառիկ ազդեցության համար, որ նրանք իրենց գործողություններով ունեցել են մարդկային կյանքի պահպանման և մարդասիրությունն առաջ մղելու գործում։
Հայոց ցեղասպանությունը վերապրողների անունից՝ ի երախտագիտություն նրանց փրկողների, «Ավրորա» մրցանակի դափնեկրին ամեն տարի 2015-2023թթ. (ի հիշատակ ութ տարի տևած Հայոց ցեղասպանության՝1915-1923թթ.) շնորհվում է 100.000 դոլար պարգև և բացառիկ հնարավորություն շարունակելու նվիրատվության շղթան՝ 1.000.000 դոլարի դրամաշնորհի առաջադրելով իրեն ոգեշնչած և գործի մղած կազմակերպություններին։
