ԵՐԵՎԱՆ, 9 հունիսի — Sputnik. Երեխայի մահվան պատճառը ասֆիքսիան է, ծնունդն իրականացվել է կեսարյան հատումով, իսկ պորտալարը փաթաթվել էր պտղի պարանոցի շուրջ։ Այս մասին Sputnik Արմենիայի թղթակցի հետ զրույցում ասաց «Աստղիկ» բժշկական կենտրոնի մանկաբարձական բաժնի վարիչ Արա Հովակիմյանը։
Երեկ «Աստղիկ» բժշկական կենտրոնում դժբախտ դեպք է պատահել․ 39 տարեկան կինը մահացած երեխա է լույս աշխարհ բերել։ Ծննդկանի բարեկամները մեղադրում են բժշկական կենտրոնի բժիշկներին։ Նրանք արդեն բողոք են ներկայացրել ոստիկանություն։
«Հղիության ընթացքին հետևող բժիշկը հունիսի 7-ին ինձ ներկայացրեց ծննդկանին, նա արդեն հղիության 39-րդ շաբաթում էր։ Վիճակը բավարար էր, բայց բժիշկի մշտական հսկողություն էր պետք», — ասաց Հովակիմյանը։
Նրա խոսքով՝ բուժող բժիշկի խորհրդով (նա հղի կնոջ բարեկամն էր) կինը հրաժարվել է ու ասել, որ վաղը կգա։
Հովակիմյանն ընդգծեց, որ պտղի դիրքը մտավախություն էր առաջացնում։ Տարատեսակ բարդություններից խուսափելու համար պետք էր կեսարյան հատում անել։ Հովակիմյանը պնդում է, ու եթե կինը բժիշկների հսկողության տակ մնար, ապա ժամանակին կնկատեին բացասական դինամիկան։
«Պորտալարը փաթաթվել էր պտղի պարանոցին։ Ես ապշել էի, երբ հանում էի երեխային։ Երեխան շնչահեղձ էր եղել ու արդեն մահացած էր», — ասաց Հովակիմյանը։
Նրա խոսքով՝ երեկ ծննդկանի բարեկամները հիվանդանոց են գնացել ու բժիշկներին մեղադրել, թե նրանց պատճառով է երեխան մահացած ծնվել։
Հովակիմյանն ու մի քանի այլ բժիշկներ ցուցմունքներ են տվել ոստիկանությունում։
