ԵՐԵՎԱՆ, 9 հունիսի — Sputnik. Աշխարհահռչակ ռոք-երաժիշտ Սերժ Թանկյանն ու Հայոց ցեղասպանության մասին ֆիլմի պրոդյուսեր Էրիկ Իսրայելյանը ցավակցել են հաղորդավար ու շեֆ խոհարար Էնթոնի Բուրդենի հարազատներին ու մտերիմներին։
«Ինձ անչափ ցնցեց Բուրդենի մահվան լուրը։ Մենք կորցրինք կյանքի ու ճշմարտության իսկական սիրահարին, խոհանոցն ու մշակույթը գնահատողին։ Ինձ համար մեծ պատիվ էր նրա հետ Հայաստանում ժամանակ անցկացնելը», — ֆեյսբուքյան իր էջում գրել է Թանկյանը։
Իսրայելյանն իր հերթին շնորհակալություն է հայտնել Բուրդենին Հայոց ցեղասպանության ճանաչման վերաբերյալ համարձակ արտահայտությունների համար։ «Խոստում» ֆիլմի պրոդյուսերի խոսքով` Բուրդենն ուզում էր Սերժ Թանկյանի հետ կրկին Հայաստան գալ։
«Քո պակասն իսկապես կզգացվի… Իմ սիրտն այսօր Բուրդենի ընտանիքի, մտերիմների ու երկրպագուների հետ է», — գրել է Իսրայելյանը։
2) He hung out, talked about possibly going to Armenia with @serjtankian & gushed about Chris’ powerful humanitarian work on @thepromisefilm… Thank you for your courageous words about the Armenian Genocide. You will be truly missed 🙏💔 pic.twitter.com/HxlaTFps3l
— Eric Esrailian (@esrailian) 8 июня 2018 г.
Շեֆ խոհարար, գրող և հաղորդավար, «Անծանոթ վայրեր» ծրագրի հաղորդավար Էնթոնի Բուրդենը երեկ ինքնասպանություն է գործել։ Նա 61 տարեկան էր։ Այս մասին հայտնել է CNN-ը։
Նախորդ տարվա հոկտեմբերին Բուրդենը եկել էր Հայաստան, հետո մեկնել Արցախ։ Իր ճանապարհորդության մասին նա պատմել էր CNN հեռուստաալիքի «Էնթոնի Բուրդեն. անծանոթ վայրեր» հաղորդման հերթական թողարկման ժամանակ։
Հայտնի հաղորդավարը եղել էր Շուշիում ու Ջդրդուզի ձորում։ Արցախում ժենգյալով հաց, խորոված, մածուն, թթի ու հոնի օղի էր համտեսել։
Ամերիկացի շեֆ-խոհարարի ճանապարհորդությունը, բնականաբար, անտարբեր չէր թողել Ադրբեջանին։ Նա հայտնվել էր հարևան երկրի «սև ցուցակում»։
