ԵՐԵՎԱՆ, 8 հունիսի — Sputnik. Հրատ մականունով (Մարս մոլորակի հայերեն անվանումը) երիտասարդ կատարողի երգի նկատմամբ նոր հետաքրքրության համար առիթ է դարձել տեսահոլովակը` պարային շոուի ուղեկցությամբ։ Նկարահանումները տեղի են ունեցել ԱՄՆ-ում` երկնաքերի տանիքում։ Տեսահոլովակում նկարվել են լավագույն հայ պարողները և պարուսույցները, որոնք հիմա բնակվում են ԱՄՆ-ում։ Տեսահոլովակի գլխավոր աստղը Միհրան Կիրակոսյանն է։
Իր կարիերայի ընթացքում Միհրանը հասցրել է աշխատել համաշխարհային մասշտաբի այնպիսի աստղերի հետ, ինչպիսիք են Բրիթնի Սփիրսը, Ռիկի Մարտինը, Փինքը և փոփ երաժշտության թագուհի Մադոննան։ Միհրանը երկու անգամ մասնակցել է նրա համաշխարհային շրջագայությանը։
2004թ.-ին հայ պարողը մասնակցել է Մադոննայի «Re-invention» նոր ալբոմի քառօրյա քասթինգին և ավելի քան 3000 հավակնորդների մեջ հայտնվել 12 լավագույն պարողների շարքում։ Երգչուհին անձամբ է ընտրել պարողներին։ Դրանից հետո Միհրանը մասնակցել է Մադոննայի բոլոր ելույթներին, ներառյալ՝ 2006թ-ի «Confessions» ալբոմի շրջագայությանը։
Հայտնի է, որ Կիրակոսյանի կարիերայի վրա առավել մեծ ազդեցություն է ունեցել Մայքլ Ջեքսոնը։ Միհրանին նաև ընտրել են «This Is It» շրջագայության համար, բայց այդ հյուրախաղերի շրջանակում նա պետք է պարեր Մայքլ Ջեքսոնի նման, այլ ոչ թե սեփական ոճով։
Միհրանից բացի տեսահոլովակում իրենց դերասանական վարպետությունը ցուցադրել են հայտնի ամերիկացի պարողներ Վահե Ղուկասյանը (Վահե), Նազիկ Սլդրյանը (Նազ), Ալիսա Դավթյանը (Ալիսա), Գև Մանուկյանը, Լիլյա Սեդրակյանը, Գրիգորի Սեդրակյանը, Արմեն Վեյը, Պոլետ Ազիզյանը, Ալեն Աշը և Մեգան Քասումյանը։
Միհրան Կիրակոսյանի պաշտոնական Youtube ալիքում տեսահոլովակի դիտումների քանակն անցել է մեկուկես միլիոնից։
