ԵՐԵՎԱՆ, 8 հունիսի — Sputnik. Գիշերային հրավառությունների մասին հարցը պետք է լուծեն իրավապահ մարմինները։ Այս մասին կառավարության նիստում ասաց վարչապետ Նիկոլ Փաշինյանը։
Առողջապահության նախարար Արսեն Թորոսյանը նկատեց, որ այսօր կեսգիշերից հետո Նորք Մարաշ թաղամասում անհայտ անձինք հրավառություն են կազմակերպել, տեսանյութերն էլ կան։
«Գեթ մեկ երեխայի հանգիստ քունն ավելի կարևոր է, քան 500-ի քեֆ-ուրախությունը», — ավելացրեց նա։
Ինչին ի պատասխան ՀՀ ոստիկանապետ Վալերի Օսիպյանը նկատեց, որ ոստիկանությունը` ժամանելով դեպքի վայր, ոչ միշտ է հայտնաբերում հրավառության հեղինակներին։
Հետամուտ կլինենք, բայց դժվար հայտնաբերվող խնդիր է դա»,- պատասխանեց ՀՀ ոստիկանապետը:
«Դե հա, թռնում ա օդ ու պայթում ա: Կրակողները չեն սպասում, մինչև ոստիկանությունը գնա: Հայտարարություն արեք՝ կրակողներին կոչ ենք անում ևս կես ժամ սպասել, մինչ ոստիկանությունը հասնի», — կատակեց Փաշինյանը։
Հետո նա հստակ խնդիր դրեց իրավապահների առաջ. «Չլինի օրենքի կանոնները խախտող հրավառություն, վերջ: Դուք լուծեք էդ հարցերը, թե չէ ես կլուծեմ»:
Հիշեցնենք, որ 2018 թվականին կայացրած որոշման համաձայն` առանց թույլտվության Երևանում հրավառություններ իրականացնելու համար առաջին անգամ նկատելու դեպքում 1 մլն դրամ (2000 դոլար) տուգանք է նախատեսվում, իսկ երկրորդ անգամ` 2 մլն դրամ (4000 դոլար)։
