ԵՐԵՎԱՆ, 8 հունիսի — Sputnik. Շեֆ խոհարար, գրող և հաղորդավար Էնթոնի Բուրդենն ինքնասպանություն է գործել։ Այս մասին հայտնում է CNN-ը։
Բուրդենը 61 տարեկան էր։ Հեռուստաընկերության պաշտոնական հաղորդագրության մեջ նշվում է, որ նա արկածների, լավ ուտելիքի ու խմիչքի սիրահար էր։
Բուրդենը մահացել է Ֆրանսիայում, որտեղ նկարահանում էին նրա Parts Unknown խոհարարական շոուն։ Նրա մտերիմ ընկեր Էրիկ Ռիպերը, որը նույնպես շեֆ խոհարար է, Բուրդենին անգիտակից վիճակում հայտնաբերել է հյուրանոցի համարում։
Ամերիկացի հայտնի շեֆ-խոհարար, գրքերի հեղինակ, ճանապարհորդ ու «Անհայտ վայրեր» ծրագրի հաղորդավար Էնթոնի Բուրդենը Հայաստան ու Արցախ է եկել նախորդ տարվա հոկտեմբերին։ Հայտնի հաղորդավարը եղել է Շուշիում ու Ջդրդուզի ձորում։ Արցախում ժենգյալով հաց, խորոված, մածուն, թթի ու հոնի օղի է համտեսել։
Ամերիկյան շեֆ-խոհարարի ճանապարհորդությունը, բնականաբար, անտարբեր չի թողել Ադրբեջանին։ Նա հայտնվել է հարևան երկրի «սև ցուցակում»։
