ԵՐԵՎԱՆ, 7 հունիսի — Sputnik. Նոր իշխանությունը խոստանում է հավասար պայմաններ ստեղծել ՀՀ բոլոր քաղաքացիների համար, այդ թվում՝ նախկին ու ներկա պաշտոնյաների: Այսօր ԱԺ-ում իր ելույթում ասաց ՀՀ վարչապետ Նիկոլ Փաշինյանը:
«Հայաստանում չեն լինելու արտոնյալներ, օրենքը հավասարապես գործելու է բոլորի, այդ թվում՝ նախկին ու ներկա բարձրագույն իշխանության ու նրանց ընտանիքների անդամների նկատմամբ: Եվ որպեսզի ասվածը չհնչի որպես սպառնալիք, առաջինը հենց իմ ընտանիքն է օրինակ ծառայելու»,- ասաց Փաշինյանը՝ հիշեցնելով, որ որդին դիմում է գրել Արցախում ծառայություն անցնելու համար:
Պաշտոնյաների որդիներին կոչ արեց` եթե գտել են բանակից խուսափելու զարտուղի ճանապարհներ, ներկայանալ ու գնալ բանակ:
Նա կոչ արեց նաև արտերկրում գտնվող զինապարտներին՝ վերադառնալ Հայաստան ու մեկնել ծառայության:
Փաշինյանը խոստացավ նաև արմատախիլ անել կոռուպցիան ու ոչ կանոնադրական հարաբերությունները բանակում, զարկ տալ ռազմարդյունաբերությանը՝ վերացնելով Հայաստանի ու Ադրբեջանի միջև առկա անհավասար ռազմական հնարավորությունները:
Վարչապետը նաև կոչ արեց սփյուռքահայ գործարարներին ներդրում անել հայրենիքում՝ խոստանալով պաշտպանել նրանց գործարար շահերն ու իրավունքները:
«Մենք բարձրացնելու ենք գործարարի վարկը: Գործարարը չպետք է իր հեղինակությամբ զիջի նախարարին, պատգամավորին»,– ասաց նա:
Վարչապետի խոսքով` այսպես մենք պետք է լուծենք նաև երրորդ հանրապետության ամենամեծ թնջուկներից մեկը՝ բիզնեսի ու քաղաքականության տարանջատումը։
