ԵՐԵՎԱՆ, 7 հունիսի — Sputnik. Բաղրամյան 26 գնացող ճամպրուկներն այսուհետ կլցվեն ՀՀ բյուջե: Այսօր ԱԺ արտահերթ նիստից հետո լրագրողների հետ ճեպազրույցում ասաց ՀՀ վարչապետ Նիկոլ Փաշինյանը:
Անդրադառնալով նիստի ընթացքում կախարդական փայտիկի մասին արած իր հայտարարությանը` Նիկոլ Փաշինյանը պարզաբանեց. «Դա նշանակում է, որ Հայաստանում շուտով չեն լինի մենաշնորհներ, բիզնեսն իր ամբողջ ծավալով կմտնի հարկային դաշտ. սրանք խնդիրներ են, որ 25 տարի չէին լուծվում, որովհետև կախարդական փայտիկ չկար: Ի տարբերություն նախորդ վարչապետների, որոնք ասում էին, որ չունեն կախարդական փայտիկ, մենք ասում ենք, որ ունենք ու բոլոր խնդիրները հերթով լուծելու ենք»:
Նիկոլ Փաշինյանն անդրադարձավ նաև գործարարների նկատմամբ իշխանության ճնշումների մասին մեղադրանքներին:
«Բոլորն ասում են, որ գործարարներին իշխանությունը ճնշում է, բայց ոչ ոք չի ասում, որ այդ նույն գործարարներին ՀՀ վարչապետը հրավիրել է ու ասել. «Հարգելի գործարարներ, ես չգւտեմ, թե դուք ամիսը քանի անգամ, ինչ ճամպրուկներով, ինչ եք բերել Բաղրամյան 26, այս պահից դուք ազատված եք բոլոր այդպիսի պարտականություններից»: Հարցրել եմ՝ եղել է նման բան, ասել են՝ եղել է: Ես ասել եմ՝ դուք ազատված եք այդ պարտավորությունից»,- ասաց Փաշինյանը: Նրա խոսքով, այսուհետ այդ ճամպրուկները կլցվեն ՀՀ բյուջե, իսկ այն մասը, որ պիտի գնար շվեյցարական բանկեր, վարչապետը հույս հայտնեց, որ կներդրվեն Հայաստանի տնտեսության մեջ:
Փաշինյանը բացահայտեց նաև, թե ինչ են ասել գործարար պատգամավորներն իր հետ հանդիպմանը։ Նրա խոսքով՝ վերջինները խոստովանել են, որ պատգամավոր լինելու ցանկություն չեն ունեցել, բայց նախկին իշխանություններն իրենց ստիպել է դառնալ ու ձայներ ապահովել իրենց համար:
