ԵՐԵՎԱՆ, 7 հունիսի — Sputnik. ՀՀԿ-ն կողմ կքվեարկի կառավարության ծրագրին: Այս մասին ԱԺ–ում հայտարարեց ԱԺ ՀՀԿ խմբակցության ղեկավար Վահրամ Բաղդասարյանը:
«Կառավարության գործունեության ծրագիրը պայմանագիր է կառավարության, Աժ-ի և ժողովրդի միջև: Այդ իսկ պատճառով այն պիտի պարունակի ոչ միայն գաղափարներ, այլև դրանք իրականացնելու քայլեր»,-ասաց Բաղդասարյանը՝ գործող կառավարությանը մեղադրելով իրավիճակին չտիրապետելու և, այդ իսկ պատճառով, հստակ ցուցանիշներ չներառելու մեջ:
«Կառավարություն, չսահմանելով կոնկրետ արդյունքներ, հրաժարվում է ստանձնել քաղաքական պատասխանատվությունը»- ասաց Բաղդասարյանը:
ՀՀԿ խմբակցության ղեկավարը նշեց նաև, որ ծրագիրն ամբողջությամբ բաղկացած է անորոշ և պոպուլիստական ձևակերպումներից:
Այդուհանդերձ, արտաքին քաղաքականության ոլորտում, նոր կառավարության ծրագիրը, Վահրամ Բաղդասարյանի խոսքով, ամբողջությամբ կրկնում է նախորդի ծրագիրը, բայց դրանում չեն հիշատակվում, Ավստրալիան, Վատիկանը, Ճապոնիան, ինչի շուրջ ՀՀԿ-ն իր տարակուսանքն է հայտնում:
«Մենք դեմ ենք կառավարության ծրագրին, բայց քաղաքական փոփոխությունը չխոչընդոտելու համար կողմ ենք քվեարկելու»,- ասաց Բաղդասարյանը՝ հաջողություն մաղթելով նոր կառավարությանը:
