ԵՐԵՎԱՆ, 6 հունիսի — Sputnik. «Գնումների աջակցման կենտրոն» ՊՈԱԿ-ը, որը 2017թ. նոյեմբերի 30-ին կառավարության որոշմամբ լուծարվել է, պարզվում է` իր գործունեության ընթացքում պետությանը 174 մլն դրամի վնաս է պատճառել։
ՀՀ գլխավոր դատախազությունը հայտնում է, որ չարաշահումը հայտնի է դարձել «Թրանսփարենսի ինթերնեյշնլ» հակակոռուպցիոն կենտրոնի իրականացրած մոնիտորինգի շնորհիվ, որի արդյունքները ներկայացվել են դատախազություն։
Այսպես` 2011-2017 թթ-ի ընթացքում բազմաթիվ դեպքերում ՀՀ գնումների բողոքարկման խորհուրդը տնտեսվարող սուբյեկտների կողմից խախտումների դեպքեր է հայտնաբերել, որոնցով դրանք պետք է տույժ-տուգանքներ վճարեին։
Սակայն «Գնումների աջակցման կենտրոն» ՊՈԱԿ-ի պաշտոնատար անձինք, չեն կատարել իրենց ծառայողական պարտականությունները, տնտեսվարող սուբյեկտներից համապատասխան գումարները գանձելու միջոցներ չեն ձեռնարկել: Արդյունքում պետությանը պատճառվել է 174 մլն դրամի վնաս։
Իսկ 2017թ. նոյեմբերի 30-ին «Գնումների աջակցման կենտրոն» ՊՈԱԿ-ը լուծարվել է:
Հարուցված քրեական գործի նախաքննությունը Գլխավոր դատախազությունը հանձնարարել է ՀՀ քննչական կոմիտեին:
