ԵՐԵՎԱՆ, 5 հունիսի — Sputnik. Եթե բարեգործությունը բխի քաղաքացու շահերից, ապա դա տեղի է ունենալու: Այսօր ԱԺ-ում հայտարարեց ՀՀ աշխատանքի և սոցիալական հարցերի նախարար Մանե Թանդիլյանը՝ պատասխանելով ԱԺ ՀՀԿ խմբակցության պատգամավոր Մարգարիտ Եսայանի՝ Էլթոն Ջոնի բարեգործական այցի ընթացքում լսողական սարքեր տրամադրելու գործընթացի մասին հարցին:
Նախարարի խոսքով՝ լսողական սարքերը խնդիրներ ունեցող քաղաքացիներին առաջիկայում կտրամադրվեն հավաստագրերի միջոցով:
«Քաղաքացիներ դժգոհում են, երբ մենք իրենց սարքեր ենք տրամադրում, որոնք իրենք չեն ընտրել»,- ասաց նախարարը։
Նա ավելացրեց, որ նախարարությունը վերանայում է դրանց տրամադրման կարգը։
«Ամենայն հավանականությամբ մենք առաջիկայում կորոշենք տենդերներ անցկացնել, որոնց արդյունքում որակյալ սարքեր կընտրվեն շահառուների համար»,- ասաց նա:
Արձագանքելով նախարարի խոսքին՝ պատգամավոր Մարգարիտ Եսայանն ասաց` այս էյֆորիկ վիճակում շատ կլինեն մարդիկ, որ կգան ու ինչ-որ հայտարարություններ կանեն ինչ-որ սարքեր նվիրելու մասին:
«Բարեգործություններ շատ կլինեն, ու չեմ կարծում, թե դրանք պետք է թմբկահարվեն այնպես, որ մենք կորած-մոլորած երկիր ենք ու երբեք լսողական սարք չենք տեսել»,- ասաց նա:
Հիշեցնենք` աշխարհահռչակ երգիչ Էլթոն Ջոնի բարեգործական այցի ընթացքում ՀՀ լսողական խնդիրներ ունեցող երեխաներին ու մեծահասակներին լսողական սարքեր էին բաժանվել:
