ԵՐԵՎԱՆ, 5 հունիսի — Sputnik. «Լիդիան Արմենիայի» գործադիր տնօրեն Հայկ Ալոյանը հայտարարություն է տարածել արդեն 2 օր իրենց աշխատանքը խոչընդոտող բողոքի ակցաիների հետ կապված` նշելով, որ նման սադրանքն ուղղված է ոչ միայն մեր ընկերության, այլև երկրի դեմ, քանի որ խոչընդոտում է օրական մի քանի հարյուր հազար դոլարի ներդրումների մուտքը երկիր:
Հիշեցնենք, որ արդեն երկրորդ օրը ցուցարարները փակել են Ամուլսարի հանքի շինհրապարակ տանող ճանապարհները, ինչի պատճառով ավելի քան 1450 աշխատակից զրկվում է աշխատանքով զբաղվելու հնարավորությունից:
«Նման սադրանքն ուղղված է ոչ միայն մեր ընկերության, այլև երկրի դեմ՝ խոչընդոտելով օրական մի քանի հարյուր հազար դոլարի ներդրումների մուտքը երկիր:
Ամուլսարի ծրագիրը բնապահպանական տեսանկյունից Հայաստանում երբևէ նախագծված լավագույն ծրագիրն է: Ծրագիրն, ի դեպ, դեռևս չի շահագործվում և գտնվում է շինարարության փուլում, այդուհանդերձ, ընկերության նկատմամբ արդեն մի քանի տարի շարունակ իրականացվում է նպատակաուղղված և ֆինանսավորված հակաքարոզչություն՝ բնապահպանական ամենաժամանակակից տեխնոլոգիաներ կիրառող և կոռուպցիոն գործարքների մեջ չներգրավված միջազգային թափանցիկ ընկերությանը շուկայից դուրս մղելու նպատակով:
«Լիդիան Արմենիան» պատրաստ է ցանկացած ստուգման՝ բնապահպանական չափանիշների, սոցիալական կառավարման, ֆինանսական հոսքերի, բաժնետերերի կազմի, հարկային մուտքերի թափանցիկության և ցանկացած այլ չափանիշներով: Ընկերությունը վստահ է, որ օբյեկտիվ և պրոֆեսիոնալ չափանիշներով ցանկացած աուդիտ կապացուցի, որ Ամուլսարում կիրառվում են Հայաստանի համար աննախադեպ և միջազգային լավագույն չափանիշները: Ընկերության աշխատանքների ապօրինի խոչընդոտումն ուղղակի հարվածում է երկրի տնտեսությանը և հեղինակությանը: Ընկերությունն ակնկալում է խնդրի իրավաչափ և շուտափույթ լուծում»,–ասված է հայտարարության մեջ:
