ԵՐԵՎԱՆ, 5 հունիսի — Sputnik, Լաուրա Սարգսյան. Հայաստան աջ ղեկով ավտոմեքենաներ առաքող ընկերությունների ներկայացուցիչները պատրաստվում են դիմել նոր իշխանություններին` պահանջելով չեղարկել աջ ղեկով մեքենաների ներկրման արգելքը։ Այդ մասին Sputnik Արմենիայի թղթակցի հետ զրույցում ասաց Հայաստանում Autocom Japan ճապոնական ընկերության մասնաճյուղի տնօրեն Արտեմ Դավթյանը։
Աջ ղեկով մեքենաների արգելքը, չնայած հասարակության դժգոհությանը, ուժի մեջ է մտել 2018թ–ի ապրիլի 1–ից։ Հայաստանի տրանսպորտի նախարարությունում արգելքը բացատրել են նրանով, որ մեր երկրում երթևեկությունն աջակողմյան է, որի դեպքում աջ ղեկով ավտոմեքենաների շահագործումը վտանգավոր է։
«Մենք պատրաստվում ենք առաջիկա շաբաթվա ընթացքում նամակ ուղարկել Հայաստանի իշխանություններին` պահանջելով թույլ տալ աջակողմյան ղեկով ավտոմեքենաների ներկրումը։ Վստահ եմ, որ նոր կառավարությունը դրական պատասխան կտա մեր հարցմանը», – ասաց Դավթյանը։
Նրա խոսքով` ցանկացած փորձառու վարորդ կհամաձայնի պարզ ճշմարտության հետ. նոր աջ ղեկով մեքենան միշտ ավելի լավ է, քան հին ձախ ղեկովը։ Ճապոնիայից ներկրվող աջակողմյան ղեկով մեքենաները գրեթե երկու անգամ էժան են, քան Գերմանիայից և ԱՄՆ–ից առաքվող ձախ ղեկով մեքենաները։ Բացի այդ, դրանց մաշվածությունը զգալիորեն քիչ է, քան ձախ ղեկով ավտոմեքենայինը։
«Ամբողջ աշխարհն անցում է կատարում հիբրիդների, էլեկտրամոբիլների, ավելի նոր մեքենաների, իսկ Հայաստանում աջ ղեկով ավտոմեքենաների բազմամյա շահագործումից հետո բարձրացնում են դրանց վտանգավորության մասին հարցը», – ասաց Դավթյանը։
Նա նշեց, որ աջ ղեկով մեքենաների արգելքից հետո Հայաստան ներկրվող մեքենաների քանակը հինգ անգամ կրճատվել է։
Նրանք, ովքեր շարունակում են մեքենա գնել Ճապոնիայից, ստիպված են լինում աջ ղեկը դարձնել ձախ` ավտոմեքենան Հայաստան բերելու համար։ Դավթյանը պնդում է, որ աջ ղեկով մեքենան ավելի անվտանգ է, քան այն, որի ղեկը տեղափոխվել է։
Բացի այդ, ղեկը փոխելը լրացուցիչ ծախս է վարորդների համար։ Վրաստանում այդ «վիրահատության» գները սկսվում են 150 դոլարից, Հայաստանում նույն գործողությունն արժե առնվազն 350 դոլար։ Բայց որոշ մեքենաների դեպքում գինը կարող է հասնել երկու հազար դոլարի։
Դա պայմանավորված է նրանով, որ ղեկը փոխելու համար անհրաժեշտ պահեստամասերը Ճապոնիայից Հայաստան են ներկրվում Վրաստանի տարածքով, հետևաբար, Հայաստանում ղեկը փոխելն ավելի թանկ է։
Հիմնականում Հայաստան են ներկրվում C, E, A դասի Mercedes, BMW, Nissan Teana, Mitsubishi Io, Subaru Forester մակնիշի մեքենաներ։ Դրանցից առավել թանկ է BMW մակնիշի մեքենայի ղեկը փոխելը։
