ԵՐԵՎԱՆ, 4 հունիսի — Sputnik. ՀՀ երկրորդ նախագահ Ռոբերտ Քոչարյանն առաջիկայում կհարցաքննվի Մարտի 1-ի գործով: Այս մասին, «լավատեղյակ աղբյուրների» վկայակոչմամբ, հայտնում է «Հայկական ժամանակը»։
Թերթը հիշեցնում է, որ այս տարվա մարտի 1-ին, 2008թ–ի մարտի 1-ի իրադարձությունների 10-ամյակի առիթով, ԱԺ–ում հրավիրված խորհրդարանական լսումների ժամանակ Նիկոլ Փաշինյանը դիմել էր ՀՀ գլխավոր դատախազին` գործին փաստահավաք խմբի «Բանակի ներգրավվածությունը Մարտի 1, 2-ի իրադարձություններին» զեկույցը կցելու և քրեական գործի շրջանակներում ՀՀ 2-րդ նախագահ Ռոբերտ Քոչարյանին հարցաքննելու առաջարկով: Փաշինյանը դատախազությանն ուղղված իր դիմումում նշել էր նաև այն կետերը, որոնց հիման վրա պետք է հարցաքննվեր Ռոբերտ Քոչարյանը:
«Տասը տարի անց նախաքննական մարմինը չի պարզել` երբ Ռոբերտ Քոչարյանը հայտարարում էր, որ մարտի 1– 2-ին քաղաքացիները դուրս են գալիս մեքենաների հետից կրակում զինվորների վրա, այս հայտարարությունն ի՞նչ փաստերի վրա է հիմնված: Գլխավոր դատախազին գրավոր դիմել եմ, պահանջել եմ, որ Ռոբերտ Քոչարյանը հրավիրվի հարցաքննության, պարզաբանի՝ ինչի հիման վրա է արել այդ հայտարարությունը Բաղրամյան 26-ում: Սա կարորագույն նրբություն է, հանրությունը պետք է իմանա, թե Ռոբերտ Քոչարյանին ով է փոխանցել այդ տեղեկությունը»,– Փաշինյանի դիմումից մեջբերում է թերթը:
Վարչապետի կնոջ` Աննա Հակոբյանի ղեկավարած թերթը եզրակացնում է, որ վարչապետ ընտրվելուց հետո Նիկոլ Փաշինյանը, փաստորեն, պատրաստվում է ամբողջությամբ բացահայտել 10 տարի քնեցված աղմկոտ քաղաքական սպանությունների գործը` պատասխանատվության կանչելով բարձրաստիճան նախկին պաշտոնյաներին:
