ԵՐԵՎԱՆ, 4 հունիսի — Sputnik. Ուսանողները հասարակության առավել ակտիվ մասն են, ուստի բուհերի ռեկտորները պետք է պատրաստ լինեն տարբեր սուր իրավիճակների։ Այս մասին ասաց ՀՀ վարչապետի կինը` Աննա Հակոբյանը` մեկնաբանելով Երևանի պետական համալսարանում տեղի ունեցած սկանդալը։
Հիշեցնենք, որ երեկ Երևանի պետական համալսարանում «ԵՊՀ ռեստարտ» նախաձեռնությունը բողոքի ակցիա էր անցկացրել։ Ակցիայի մասնակիցները պահանջում էին, որ ռեկտոր Արամ Սիմոնյանը հրաժարական տա, հոգաբարձուների խորհուրդը լուծարվի, համալսարանում աուդիտ անցկացվի և ժամանակավորապես դադարեցվի ուսխորհրդի և արհմիության գործունեությունը:
Ռեկտորը հանդիպել էր դասադուլ անող ուսանողների հետ` նշելով, որ իր հրաժարականի պահանջն իրավաչափ չէ: Ի նշան բողոքի` ուսանողները փակել էին դահլիճի դուռը, ինչի հետևանքով ռեկտորի ինքնազգացողությունը վատացել էր։ Նույն օրը երեկոյան Արամ Սիմոնյանին տեղափոխել էին հիվանդանոց:
Հարցին, թե ինչպե՞ս է գնահատում ուսանողների՝ ռեկտորի հրաժարականին ուղղված բողոքի ակցիաները, Աննա Հակոբյանն ասաց, որ սա այն դեպքն է, երբ չի կարող բացասական պատասխան տալ։
«Եթե ուսանողները բողոքելու, ազատ քայլեր ձեռնարկելու և իրենց տեսակետն արտահայտելու հնարավորություն չունենան, ինչպես դա եղել է մեր երկրում մինչ հեղափոխությունը, ապա դա ապագայում լուրջ խնդիր կդառնա Հայաստանի համար», — վստահ է Հակոբյանը։
Նա նաև նշեց, որ ցավում է Սիմոնյանի առողջական վիճակի համար և հույս ունի, որ նա շուտափույթ կապաքինվի։
«Բուհերի ուսանողներն իրավունք ունեն պայքարելու իրենց իրավունքների համար, իսկ ռեկտորատը պարտավոր է իր աշխատանքն այնպես կատարել, որ ուսանողները գոհ լինեն», — ասաց Փաշինյանի կինը։
Հակոբյանն ավելացրեց, որ Հայաստանի բարձրագույն կրթության ոլորտում գոյություն ունեն մի շարք խնդիրներ, որոնք պետք է լուծել։
