ԵՐԵՎԱՆ, 4 հունիսի — Sputnik. Արցախյան իրադարձությունները հանգել են մի փուլի, որի ընթացքում ցուցարարները պետք է իշխանությանը հնարավորություն տան պայմանավորվածություններն իրագործելու համար։ Այս մասին ասաց ՀՀ վարչապետ Նիկոլ Փաշինյանը` ուղիղ եթերում ցուցարարներին կոչ անելով դադարեցնել ցույցերը։
«Պայմանավորվածությունները պետք է իրագործվեն հանդարտ, ոչ նյարդային պայմաններում»,- ասաց նա։
Վարչապետը նշեց, որ ուշիուշով հետևում է Արցախի իրադարձություններին, օրը մի քանի անգամ տեղեկություններ ստանում այնտեղից։
«Որևէ կասկած չկա, որ ուժային կառույցների ներկայացուցիչների պահվածքը մտահոգիչ է։ Այս իրավիճակը պետք է կոնկրետ լուծումներ ստանա և շատ կոնկրետ հետևությունների բերի»,- ասաց Փաշինյանը՝ նշելով, որ կապի մեջ է Բակո Սահակյանի հետ։
Նրա խոսքով` ըստ էության ցույցը իր նպատակին հասել է, և այժմ գնդակը Արցախի իշխանությունների դաշտում է։
«Ճիշտ կլինի, որ հարգելի ցուցարարները գնդակը թողնեն Արցախի իշխանությունների դաշտում, և եթե այդ իրավիճակը չհանգուցալուծվի ձեռքբերված պայմանավորվածությունների շրջանակներում, նորից կարող են գնդակը հետ բերել իրենց դաշտ, եթե պատկերավոր արտահայտվեմ։ Չեմ ուզում որևէ գնահատականներ տալ կատարվածին, այս պարագայում առավել կարևոր է, որ իրավիճակը հանգուցալուծվի ոչ թե կոնֆլիկտի համաձայնության մթնոլորտում»։
