ԵՐԵՎԱՆ, 2 հունիսի — Sputnik. Իշխանափոխությունից հետո հայ գործարարները Հայաստանում փոփոխություններ են նկատում: Այս մասին այսօր Sputnik Արմենիայի թղթակցին ասաց ՌԴ փոքր ու միջին արտահանողների ասոցիացիայի նախագահ Յուրի Շուրիգինը:
«Եթե նախկինում Հայաստանում առևտրային մենաշնորհներ կային մի շարք ապրանքախմբերի մասով՝ հավի միս, շաքարավազ և այլն, ապա հիմա մաքսատանը դրանք շատ հանգիստ ու արագ ձևակերպում ու մուտքի իրավունք են տալիս: Եթե նախկինում դա մի քանի օր էր տևում, ապա հիմա` ընդամենը 40 րոպե»,- ասաց նա:
Միակ բանը, որ Շուրիգինի համար անհասկանալի է մնում, այն է, թե ինչպես Հայաստանին հաջողվեց այդքան կարճ ժամանակահատվածում այդպիսի մեծ փոփոխություններ իրականացնել:
Ռուսաստանցի հյուրը մեր երկիր է եկել Հայաստանի Առևտրաարդյունաբերական պալատի հրավերով՝ մասնակցելու Ծաղկաձորում կազմակերպված «ԵԱՏՄ՝ Հայաստան-համագործակցություն» գործարար համաժողովին:
Նման հանդիպումները, Շուրիգինի դիտարկմամբ, թույլ են տալիս գործարար կապեր ձևավորել ու դրանց միջոցով դուրս գալ նաև երրորդ երկրների շուկաներ:
«Յարոսլավի մարզից ռուսական ընկերությունները փորձում էին իրանական շուկա մուտք գործել, բայց պարսկերենի չիմացությունն ու տեղի մենթալիտետի անտեղյակությունը լուրջ խոչընդոտ էին: Հայկական կողմն առաջարկեց աջակցել, և ռուսական ընկերությունը սկսեց Հայաստանի միջոցով արտահանումներ իրականացնել դեպի Իրան»,- ասաց ռուսաստանցի հյուրը՝ ավելացնելով, որ հայ գործարարների հետ աշխատելը ոչ միայն դժվար չէ, այլև հաճելի է. այստեղ լիակատար փոխըմբռնում ու պատրաստականություն կա:
Միակ հանգամանքը, որ անհանգստացնում է ռուս գործընկերներին, Շուրիգինի խոսքով, Հայաստանի սահմանափակ շուկան է:
Ռուսաստանից ժամանած մեկ այլ մասնակցի՝ ՌԴ Տոմսկի շրջանի Առևտրաարդյունաբերական պալատի նախագահի խորհրդական Էդուարդ Բելյաևի կարծիքով, հակառակը՝ հայաստանյան փոքր շուկան խոչընդոտ չէ գործարար հարաբերությունների զարգացման համար:
«Եթե համեմատենք Ուզբեկստանի, Ղազախստանի շուկաների հետ, որոնք հսկայական են, դրանք, իհարկե, տնտեսական առումով ավելի շահավետ են, բայց հարմարավետության ու բարեկամական հարաբերությունների տեսանկյունից Հայաստանն, անշուշտ, թիվ մեկ ցանկալի առևտրային գործընկերն է Ռուսաստանի համար: Եթե առաջնորդվենք միայն մասշտաբներով, ամեն ինչ կավարտվեր միայն Ղազախստանով ու Բելառուսով»,- ասաց Բելյաևը:
Նրա խոսքով` ՌԴ պետական ու մասնավոր սեկտորում մեծ հետաքրքրություն կա Հայաստանի միջոցով նաև այլ շուկաներ դուրս գալու ուղիների նկատմամբ:
«Բայց Հայաստանն, իհարկե, ԵԱՏՄ երկիր է, հետևաբար կարևոր է նախ ամուր տեղ գրավել հայաստանյան շուկայում, հետո միայն մտածել ավելի հեռուն գնալու մասին»,- ասաց նա:
Գործարար համաժողովին ներկա էր նաև ՀՀ տնտեսական զարգացման և ներդրումների նախարար Արծվիկ Մինասյանը։ Նա նշեց, որ Հայաստանը ԵԱՏՄ երկրների շարքում լավ դիրքերում է ոչ միայն բիզնես միջավայրի բարելավման, այլև աշխարհագրական ու աշխարհաքաղաքական տեսանկյունից:
«Մենք լայն հնարավորություններ ունենք ԵՄ-ի GSP+ առևտրային ռեժիմի (Արտոնությունների ընդհանրացված համակարգ), ԵԱՏՄ-ի և Իրանի հետ կապի, ինչպես նաև ԵԱՏՄ-ում երրորդ երկրների ներգրավվածության հարթակ ստեղծելու առումով»,- ասաց նախարարը՝ գործընկերային հարաբերությունների խորացման հարցում կարևորելով կողմերի միջև բաց քննարկումները,հնարավորությունների ուսումնասիրությունը, խնդիրների վերհանումն ու դրանց լուծման ուղիների որոնումը:
ՀՀ Առևտրաարդյունաբերական պալատի նախագահ Մարտին Սարգսյանն էլ հայտնեց, որ 2-օրյա համաժողովի ընթացքում արձանագրված հարցերը հետագայում կներկայացվեն ԵԱՏՄ քարտուղարություն, որտեղ դրանք արդեն քննարկման առարկա կդառնան անդամ երկրների բարձր մակարդակներում:
