ԵՐԵՎԱՆ, 2 ապրիլի — Sputnik. ՀՀ ոստիկանությունը մի շարք միջոցառումների շնորհիվ պարզել է, որ Լոռու մարզի Մեծավան համայնքի ղեկավար Սերյոժա Վարդանյանը, չարաշահելով պաշտոնական դիրքը, յուրացումներ է կատարել: Այս մասին հայտնում է ՀՀ ոստիկանության մամուլի ծառայությունը:
Սերյոժա Վարդանյանը 2013 թվականին հունիսից Մեծավանի մշակույթի կենտրոնում որպես տնօրեն է ձևակերպել Երևանի մի բնակչուհու, 2017թ. հունվարից, որպես դռնապահ, Մեծավան գյուղից մի տղամարդու, իսկ 2014թ. դեկտեմբերից համայնքապետարանում իբրև հնոցապահ, դարձյալ Մեծավանից մի կնոջ, որոնք իրականում չեն հաճախել աշխատանքի, իսկ նրանց անվամբ մինչ օրս դուրս գրված աշխատավարձի գումարները, ընդհանուր` մոտ 6 միլիոն 712 հազար դրամ յուրացվել է:
Բացի այդ, Վարդանյանը, նույն եղանակով, սոցիալական օգնության ցուցակներում, որպես անապահով ընտանիքների անդամներ է ձևակերպել Մեծավան գյուղից ութ բնակչի, սակայն նրանք իրականում չեն ստացել օգնության ընդհանուր՝ 280 հազար դրամը, որը նույնպես յուրացվել է:
Նյութերի նապատրաստման ընթացքում պարզվել է նաև, որ նշվածներից զատ, Վարդանյանը 2017 թվականի հուլիսից սոցիալապես անապահով ընտանիքների անդամների ցուցակում Մեծավան գյուղից բնակիչների է ընդգրկել ու յուրացրել նրանց հատկացվելիք գումարները:
Ոստիկանների բացատրական աշխատանքի շնորհիվ Մեծավան համայնքի ղեկավար Սերյոժա Վարդանյանը ներկայացել է ոստիկանության Տաշիրի բաժին, տվել բացատրություն: Միջոցառումներ են ձեռնարկվում կատարվածի բոլոր հանգամանքները պարզելու ուղղությամբ: Հետաքննությունը շարունակվում է:
