ԵՐԵՎԱՆ, 1 հունիսի — Sputnik. Թուրքիայի քրդամետ «Ժողովուրդների դեմոկրատական կուսակցության» (ԺՀԿ-HDP) նախկին համանախագահ Սելահաթթին Դեմիրթաշը, որն այժմ գտնվում է բանտում, հարցազրույց է տվել «Ակոս» պարբերականին։
Նա անդրադարձել է Դիարբեքիրւմ հայերի պատմությանը, ինչպես նաև հայ պատգամավոր Կարո Փայլանին։ Վերջինս մասնակցելու է Թուրքիայում հունիսի 24-ին կայանալիք արտահերթ խորհրդարանական ընտրություններին։ Նա հենց Դիարբեքիրից է առաջադրվել որպես պատգամավորի թեկնածու։
«Կարոն Դիարբեքիրին է վայել, իսկ Դիարբեքիրը՝ Կարոյին։ Դիարբեքիրում նախկինում շատ մշակույթներ և ինքնություններ կային։ Դիարբքիրից Կարոյի պատգամավոր լինելը տխուր պատմությանը տրված ամբողջական պատասխան է։ Համոզված եմ Դիարբեքիրի ժողովուրդը Կարոյին կհյուրընկալի պատմական գիտակցությամբ և ոգևորվածությամբ։ Կարոն Դիարբեքիրի համար օտար չէ։ Հավատում եմ, որ նրա և Դիարբեքիրի երիտասարդների միջև կստեղծվի լավ հաղորդակցություն։ Իրեն հաջողություն եմ մաղթում։ Հայերը Դիարբեքիրի ոչ թե հյուրերն են, այլ բնիկները»։
Դեմիրթաշը նաև ասել է, որ անցյալում Դիարբեքիրը բազմազգ բնակավայր էր, և նույնիսկ իր մանկության ժամանակ հայեր կային այնտեղ։ Ըստ նրա՝ բացի Հայոց ցեղասպանությունից, տեղի հայերի արտագաղթի պատճառ դարձավ նաև Թուրքիայում 1980-90թթ. տեղի ունեցած իրադարձությունները։ Բռնաճնշումների հետևանքով հայերը լքեցին իրենց բնակավայրերը։
