ԵՐԵՎԱՆ, 1 հունիսի — Sputnik. ԱԱԾ պետ Արթուր Վանեցյանն այսօր լրագրողների հետ զրույցում խոստացավ, որ առաջիկա օրերին նոր բացահայտումներ կլինեն ։ Իսկ մինչ այդ հիշեցրեց, որ արդեն բացահայտված կոռուպցիայի ու չարաշահումների ծավալները նախապես հայտարարվածից շատ եղել։
«350 ԱՁ-ն, որ այդքան շահարկվեց, իրականում եղել է 460 և ավելի»,- ասաց նա։
Sputnik Արմենիայի հարցին, թե արդյոք ցանցային առևտրով զբաղվող մյուս 11 կազմակերպությունները «Երևան սիթիի» բացահայտումներից հետո արձագանքել են ԱԱԾ-ի կոչին ու վերականգնել չվճարված հարկերը, Վանեցյանը պատասխանեց. «Նրանք ևս պետք է հրավիրվեն։ Նրանց մասով թիվը կհասնի, կարծում եմ, 1000 և ավելիի»։
Նույն հարցին պատասխանելով` ՊԵԿ նախագահ Դավիթ Անանյանն ասաց, որ խոշոր գործարարների ֆինանսական պատասխանատուների հետ հանդիպել են, քննարկել խնդիրներն ու ժամանակ տվել։
«Ժամանակ ենք տվել մի քանի օր, որպեսզի իրենց ծրագրային խնդիրները կարգավորեն։ Այսօր- վաղն այդ օրերը լրանում են։ Լրանալու պահից մենք մեր վարչարարությունը` օրենսդրության ամբողջ ծավալով, իրականացնելու ենք, որպեսզի համոզվենք, որ իրենք գործում են օրենքների շրջանակներում»,- ասաց Անանյանը։
Sputnik Արմենիայի հարցին, թե արդյոք «Երևան սիթիի» բացահայտումների արդյունքում եղել են տնտեսվարողներ, որոնք կամովին են վճարել մինչ այդ թաքցրած հարկերը, Դավիթ Անանյանը պատասխանեց. «Մայիս ամսվա պլանը կատարվել է 102 տոկոսով` գերակատարվել է։ Իսկ դա նաև այս աչալրջության արդյունքն է»։
Հիշեցնենք`«Երևան սիթի» սուպերմարկետների ցանցում կատարված քննչական գործողությունների արդյունքների մասին հայտարարության մեջ ԱԱԾ-ն դիմել էր ցանցային առևտրով զբաղվող ևս 11 խոշոր կազմակերպությունների` նշելով, որ քրեական գործի շրջանակներում ստուգողական բնույթի գործողություններ են իրականացվելու նաև նրանց մոտ, ուստի վերջիններին առաջարկել էր ինքնուրույն վերահաշվարկել չվճարված հարկերն ու ներկայացնել նախաքննական մարմին` պետությանը պատճառված վնասի հատուցման հարցը լուծելու համար։
