ԵՐԵՎԱՆ, 1 հունիսի– Sputnik. Նրա կողմնակիցներից մեկը` Մարիամ Աղաջանյանը, որոշել է ինքնատիպ նվեր մատուցել սիրելի վարչապետին։ Նա իր ձեռքով պատրաստած տիկնիկներ է ցանկացել նվիրել Նիկոլ Փաշինյանին` տեր և տիկին Փաշինյաններին։
Տիկնիկների վերնաշապիկների վրա ասեղնագործած է «դուխով» բառը, իսկ ուսերին` եռագույնն է` շարֆի տեսքով։
Այսօր առավոտյան Մարիամը եկել էր կառավարության շենքի մոտ` վարչապետին իր նվերը հանձնելու։ Նրան հաջողվեց կապվել Փաշինյանի մամուլի քարտուղարի հետ, որը տեղեկացրեց, որ վարչապետի աշխատանքային գրաֆիկն այսօր շատ խիտ է, նա պետք է Էջմիածին մեկնի։
Բայց դա էլ չկանգնեցրեց աղջկան։ Նա իր մեքենայով մեկնեց Էջմիածին, և երբ Նիկոլ Փաշինյանը դուրս եկավ Մայր Աթոռի Մատենադարանից, աղջիկը մոտեցավ և անձամբ շնորհավորեց նրան։ ՀՀ վարչապետը շնորհակալություն հայտնեց, մի քանի րոպե խոսեց աղջկա հետ, բայց հրաժարվեց նվերն ընդունելուց։
Վարչապետը կարծում է, որ եթե ինքն ընդունի աղջկա նվերը, մյուս քաղաքացիներն էլ կշտապեն նվեր բերել, իսկ դա անընդունելի է։
Մարիամը հույս ունի, որ իրեն կհաջողվի տիկնիկները նվիրել Փաշինյանի կնոջը` Աննա Հակոբյանին։
